Mano ba kham bang thep vote, u shynrang ne ka kynthei?

Haba peit ia ka elekshon shiteng samoi sha ki lai tylli ki Con stituency ba dang shu dep, ka pyni shai ba ki kynthei, ki kham bang ban thep vote, ban ia ki shynrang bad kata ka long ba ha Mawryng kneng, ki shynrang, ki don 13,358 ngut kiba thep vote, katba ki kynthei, ki don 15.329 ngut bad ka jing don vote ka long 17,765 ngut ki shynrang bad 18,986 ngut ki kynthei, ha kaba ka jing iapher, ha ka jing thep vote, ka long da 1,221 vote, katba ha ka jingdon vote, ka long 1,972 vote, ba ki tam ki vote kynthei ia ki shynrang.

Ha Mawphlang, ki shynrang ki thep vote 12,430 bad ki kynthei, ki thep vote 14,903 bad ha Rajabala, ki shynrang ki thep vote 14,462 vote, katba ki kynthei, ki don 15,219 vote bad kumta, ha baroh lai tylli ki Constituency, ki kham bun hi ki kynthei kiba thep vote, wat la ka ophis elekshon, kam shym ai pat ia ka percentage, halor ka jing iapher ki nongthep vote shynrang bad kynthei.

Haba ka long kumne, ka wan ka jing kylli, ba balei ki kham bun, da ki kynthei kiba thep vote; lane ha kawei ka kyntien, ioh lehse, ki shynrang, ki la ngiah thep vote ne ki kham kit khia pynban, ki kynthei, ia katei ka bhah jongki, ha ka synshar paidbah? Ka la dei ia ka tnat pyniaid elekshon, ba kan jurip, halor kane ka mat, ba la u shynrang, u ngiah tang ban thep vote, ne ioh lehse u ngiah ruh ban pynrung kyrteng thep vote bad lada u ngiah ban thep vote, kaei ka daw, kaba pynlong ba kin kham bun, da ki kynthei, haba u shynrang, u dei uba stet, uba sting, ban beh sha kano kano ka kam, kaba u sngew mon.
Ka jing shisha, ka long ba kane ka dei ka elekshon, kaba pyn lung mynsiem ia u paidlang jong ka Constituency bad kumta ki kynthei, ki ju long kiba kham lung mynsiem (emotional) bad nangta, ki kynthei pat, ki dei ruh kiba skhem jingmut triang, ia kaba ki la rai te ki la rai, katba u shynrang, u ju nud ban kylla, wat ha ka shi khyllipmat, lada u sngew ba ka wan ka kabu kaba kham bha.

Ka la don ka jing iakren, ha kine ki sngi, ba ki kynthei, ki dei ban don bynta ha ka kam jied Sirdar, Rangbah Shnong, lane kaba mut hi, ba ki kynthei, kin sa ioh lad ban long Sirdar, Rangbah Shnong bad haba ka long kumta, ka dei ban long ia U Syiem, U Dolloi, U Wahadar ruh kumjuh.