Mano ba ioh myntoi, na ka MLA skhim?

Kawei ka sengbhalang, ka la rah ia ka mat, kaba donkam bha, ha ki khyndiat sngi ba ladep bad kata ka dei, halor ka jing pyn donkam ia ka MLA skhim; hynrei, haduh ha kine ki sngi, ngi iohi, ba ia katei ka pisa, la shu bret kai ha nala bad ka dei ka bym don jingmyntoi wat shi damli ruh; hynrei katei ka pisa, ka pyn kylla nongkhaii pynban, ia ki MLA, namar ba ki kylla long ki nong thied tin sop iing, ki nongthied shuki, ki nongthied syntex bad bun jait, ki tiar, kiba ki leit sam pateng sha ki nongjied jongki.

Ngim tip, la ki nongshim, ki sngew donkam ne sngew myntoi, ia kitei ki jingioh, kum ki miej, ki shuki, ki syntex bad kiwei kiwei; namar ba kitei kim pyndap ja, satia tang shisien bam ruh, lane kim pynmih bai kot satia ia ki khun jong kito kiba donkam, lane kim pynbiang bai dawai ia kito kiba donkam ia ka jingsumar ba kyrkieh.

Ha kine ki sngi, lei, ka MLA skhim, ka la kylla long ka tyngka pliah, ha kaba U MLA, u khung ia ki byrni ki pisa bad u sam sahuh, la kum ka pisa ia khalai bad katei ka dei tang ka rong shisngi, ha kaba ka don ka jing ia khublei; hynrei katei ka pisa, ka shu sep ei noh, tang mar ia poi ha surok, namar ba ka pisa iohei, kam ju shong slem satia hapoh pla bad ka dait buid, la kumba dait u thyllah bad ka kwah ban shu bret kai ha ki jingthied ki bym myntoi satia.

Kane ka jingleh maphot ia ka MLA skhim, kam ju jia satia ia ka MP Skhim, ha kaba ia ka MP skhim, la pyntrei kam, ha kaba tei ia ki madan, ki lynti iaid kjat, ki iing dorbar bad kumta ter ter; katba ka MLA skhim, ka la kylla long ka pisa ia khalai, ha kaba lah ban shu ia sam da ka pisa pliah, lane, lah ban shu ia sam, da ki miej, ki shuki, ki pliang bad ki tiar ki tar, bym shongdor eiei ruh.

Na ka liang jong ki riew shemphang, ki la dei ban tuklar teng noh ia katei ka skhim, kaba shongdor T.2.5klur ia uwei U MLA lane T.150klur ia baroh ki 60ngut ki MLA bad haba khein ha ka san snem, katei ka pisa, kaba shongdor T.900klur, ka shu hap lut khait hapoh nala.
Ym tang katta, ka la dei ruh ban don ka kynhun tohkit, kaba leit ban wad jingtip, na ki paidbah jong ki Constituency bapher, la katei ka T.900 klur, ka la pynmyntoi ne em, tang ia kawei ka longiing, ha kano kano ka Constituency.