Mano ba heh pla, na ka jingwan ki nongshangkai sha Ri Khasi?

Ka Khasi Students Union, South Khasi Hills District, ka la leit ujor, ha ki khyndiat sngi ba ladep, sha ka DC, halor ka jingthmu ban rahbor, ia uwei u hep rit, ha ki nongleitkai na Sohra.

Katei ka dei ka mat kaba khia shibun, ba ki don pleng, ki nongleit kai, kiba leh nongshohnoh, nong lute bad nongrah briew bad lada ka long kumta, ka donkam ia ki kyndon kiba pyrkhing, ban lait ka jingshah pynjah burom ka Ri Sohra bad halor kane ka mat, ngi dei ban kynmaw, ba u sohshnong, u dei hi u sohshnong bad utei u lah ban bret da ki lak, na ka bynta shisien; hynrei, ynda haba la shrah ka shnong ka thaw, utei ula phet baklybak bad uba hap ban peit ia ka jaboh jabain, ia ka pyut ia ka pyar, u dei u trai jaka.

Hangne, ka jingkylli, kaba wan ha khmat duh, ka long ba naduh, ba ki wan kine ki nongshongkai, katno ngut ki nong Sohra, kiba la khie ka kamai kajih jongki; hynrei haba shu ia peit mangi kiba nabar, ngi iohi, ba ki don tang khyndiat ngut eh, kiba buh home stay, kiba ioh kamai na ki nong sahmiet, hynrei lada phi iaid kai sawdong ka Sohra, phin iohi, ba kito ki hajar ngut kiba leit shangkai kylleng kylleng, ki dei kiba ai kamai ia ki kali Assam suda bad ym tang katta, hynrei ia ki hotel ruh kiba la pynap lypa ha Guwahati bad haba kumta, ka kam shangkai ha Sohra, kam don jingioh eiei ruh em, ia ki trai shnong jong ka thain.

Kane ka dei ka mat, kaba khia tasam haduh katta katta bad ka Hima Sohra, kaba dei ka trai jaka, lem bad ki bor shnong, ki dei ban pyrkhat kyrkieh eh, ia kane ka kam bad kim dei ban khmih lynti, ba ka sorkar jylla, kaba kylla man ka san snem, kan shu pynbam shamoit ia ki bad ki dei ruh ban sngewthuh, ba lada kim thaw ain mynta, lano kin thaw, namar ba ka jingbhabriew jong ka ri Sohra, kan nym neh shirta bad kan sa poi ka por, ba ki nongshongkai kim kwah shuh ban leit shajuh shi shajuh.

Ka por kam ap ia ki trai shnong ka Sohra, Dawki; ba kin thaw kyrkieh, ia ki kyndon kiba biang eh, ba kin ia im ma ki bad dei ban shim na ka ain khang doh masi, ka Assam, kaba thew ia ka jing myntoi jong katei ka jylla bad ma ngi ruh ngin hap sngewthuh ba kat nang ishngiam ka Ri Khasi, hynrei kiba nang thied kali; kiba nang tei ia ki hotel bad kiba nang khie spah, ki dei pynban ki khar Assam.