Lah poi ka elekshon, don ruh kiba kwah shakri ialade bad ia la ki iing ki sem

Ka elekshon MDC, ka la poi noh bad ha kaba kum katei ka por, ki wan pleng shibun ki jingmut jingpyrkhat ha kiba bun bad katei ka jingmut ka kham khih phaloh, ha ki nongialam ban ia ki riew paidbah bad kata ka long, ba ki riew paidbah, ki don kiba kwah pisa lane sa kiwei pat kiba kwah ban shu kyrshan shibeit ia kano kano ka parti kaba ki sngew ieid bad ki sngewmon, katba ha ki nongialam sain pyrthei, ki don da kawei pat ka jingmut bad kata kam dei ban leit rah ia ki mat jongki sha ki paidbah, hynrei ki kwah ban shim kabu ha kaba kum kane ka por, ban sei madan ia la ki khun ki tnga, ki hynmen ki para, ki pyrsa bad sa kito pat kiba la long MLA ruh ki kwah ban iakhun shuh shuh sa ia ka elekshon MDC.

Kane ka dei ka jingjia kaba jia ha kane ka elekshon bad katei ka jingthmu ka paw shai, ba kiba kham lalot kim dei ki paidbah, hynrei ki dei ki nongialam bad kim shim ba kane ka dei ka kam ban leit shakri ia ki paidbah, hynrei ki shim, ba kane ka dei ka kabu ksiar ban ai kam ia la ki khun ki tnga, ia la ki hynmen ki para bad ki pyrsa jongki bad haba kim don pat kitei ki riew lalot na la iing, ki kurup hi ialade, da kaba ki kwah ban bat ia ka kam MDC ruh, nalor ba ki la long MLA.
Kat haduh mynta, ngi iohi, ba ki don ar tylli ki seng sain pyrthei, kiba la kyrni ha kane ka buit ban pynkiew skong ia la ki iing ki sem bad kitei ki kynthup ia ka seng NPP bad ka UDP, ha kaba ki don ki Constituency, ba ki MLA, ki kwah ban ialeh sa ia ka MDC, nangta ki don pat kito kiba pynmih kyrtong da la ki jong ki pyrsa, ki khun, ki tnga bad ki hynmen ne ki para jongki ruh.

Kane ka rukom treikam paidbah, ka long kaba ijli haduh katta katta bad kaba kdew shai ruh, ba kane kam dei shuh ka jingthmu ban leit sha ka dorbar jong ka Khasi bad Jaintia district Council, na ka bynta ban pynneh pynsah ia ki riti dustur, hynrei ka thew pynban ban leit rah ia la ka jong ka riti dustur iing jongki, ban bud ha katei ka Council, na ka bynta ban ia ai kam ia la ki jong ki jong ki iing ki sem, ki kur ki jait bad kumta ter ter.

Ka elekshon sha Khasi District Council, kam ia dei satia bad ka elekshon dorbar jylla, namar ba ka dorbar jylla, ka don ia ki riti treikam bad ki ain kiba batai thik pa thik, katba ka elekshon District Council, ka dei ia kito kiba tip ia ki rit dustur bad kim dei satia ia kiba kwah ban kyntiew skong ia la ki iing ki sem.