U kyrtong MDC jong ka seng Voice of the People Party (VPP), uba ialeh na Jaiaw Constituency, ula ujor pyrshah ia ka dorbar shnong Mawlai Datbaki, ba kim shah, ba un pynlong jingialang paidbah, ha u pud u sam jong katei ka shnong.
Ka elekshon MDC, ka dei kaba rit bad ka jingpynlut ka long tang T.5lak, na bynta uwei u kandidet bad lada leit pynlong jingialang sha kylleng ki shnong, kumta kan ktah ia ka lut ka sep bad ka por bad ka bor jong ki kyrtong bad kumta lada shu pynlong da ka rynsan paidbah, kan long ka jingmyntoi kaba khraw, namar ba ki bor shnong, kin lah ban pynbiang ia ka tynghung, nangta kin ai ruh ia ka sha ka dud ia kiba wan jingialang bad nangta sa ki paidbah ruh, ba kin nym ia bunkam eh man ka miet ban leit sngap ia ki jingialang jong ki kyrtong MDC bad katei kan tyngkai ia ka por, ka bor bad kumjuh ia ka jinglut jingsep jong ki kyrtong bad ki seng sain pyrthei.
Ha kane ka juk shai, ha kaba ki briew, ki pyndonkam da ki mobile ban sngap ia ki jingkren jong ki kyrtong, khamtam ha ki Constituency kiba ha sor bad khap sor, kumta ka donkam eh ban nym ia beh than, da kaba rung sha ki shnong bapher, hynrei ban pynsngew beit ia ki mat bapher jongki, lyngba ki social media, lane da ka common platform, ha kaba shisien leit jingialang, la ioh lut ia baroh ki jingtip kiba dei na baroh ki kyrtong kiba iakhun ha kano kano ka Constituency.
Ka jingpynlong ia ki common platform, ka long ruh kaba biang than, namar ba ka dei tang katei ka rynsan, kaba pyni ia ka jingdonsap jong ki kyrtong kiba ialeh ia ka elekshon MDC, MLA bad wat ia ka MP ruh kumjuh, namar ba ka jingleit mihkhmat sha kitei ki dorbar, kam dei tang ban pyndap ia ki jaka shong, hynrei ka dei ban pyni ia ka jingtbit bad ka jingshemphang jong utei u dkhot, uba leit rung sha katei ka iing dorbar bad ka long ruh kaba bakla shibun eh, ban shu shaniah beit ia ka jop bad ka rem elekshon, ha uwei u briew, namar ba uno uno uba kren lem bad kyrshan ia kiwei pat, un nym lah satia ban leit kren lem ia uta u dkhot hapoh iing dorbar.
Ka dorbar Mawlai, ka la leh ia kaba bha tam bad kumta, ka long kaba kongsan, ba kiwei ki dorbar shnong, kin bud nuksa ia kane ka rynsan iatainia jong baroh lang ki kyrtong bad dei tang katei ka lad, ka ban peit bad bishar shisha, ia ka jingtbit jong ki kyrtong, kiba tbit ban long ki nongmihkhmat paidbah.
Phi don ban ong eiei?