Hapdeng ka jing ia pyni bor, jong ki nongniah kali kamai bad ka sorkar jylla, ka mih ka phang hangne, la kan kham bha ban pynkiew dor noh ia ka bai kali, lane kan kham bha ban pynhiar dor biang noh ia ka bai petrol?
Ka sorkar jylla, ka la pynhiar dor da ar tyngka, ia ka bai petrol bad diesel, hynrei ki nongniah kali, kim pat hun bad hangne, u mih u dak jingkylli; sa katno ki kwah?
Ngi hap ban sngewthuh, ba ka dor jong ka petrol, diesel, kam dei satia, ba la buh dor, da ka sorkar jylla, hynrei, da ka sorkar India, lane da ka dor jong ka jing ia die ia thied, ia ka umphniang rew bad nalor katei ka dor, ka sorkar jylla, ka shim sa ka khajna, kaba ki ong ka VAT, katba ka sorkar India, ka shim ia ka excise duty.
Ka sorkar jylla, ka don ia ka bor ban dang pynhiar dor shuh ia ka petrol, diesel, namar ba kham mynshwa, la ju leh teng, haba ka jia ka jingkiew dor, kaba jur, kaba kum kane; hynrei ka mat hangne, kam dei tang kumta, namar ba ki nongniah kali, ki dawa ia ka jing pynhiar dor petrol, diesel lane ban pynkiew bai kali noh bad nangta, ki dawa ruh ban map ia ki khajna, da ka sorkar jylla.
Lada shu iakren beit, na kaei kaba ju long, ngi lah ban pynkut nia, da kaba ong, ba ka sorkar jylla, ka la dei ban nym tuklar shuh, ia ka mat jing dawa jong ki kali kamai, namar ba haba kim hun, ia ka ar tyngka, ngim tip, la kin hun ne em, ia ka san tyngka bad kumta ter ter.
Ym tang katta, la ju iohi, ha kine ki sngi, ba ka dor jong ka tnat pyniaid kali, ka long da kumwei, katba ka dor bai kali, ka long da kumwei bad ki kali kamai, ki ju pyntrei kam, da ka dor lajong bad haba kumta, ka sorkar jylla, ruh ka hap ban kohnguh bad u paidbah nongshong kali, lei um nud satia, ban ang shi kyntien ruh.
Ka dor petrol, diesel, ka dei kaba ym juh thikna satia, ia ka kiew ka hiar jongka bad ha ki por lock down, ka dor ia ka umphniang rew, ka la long kumba shu ai ei, hynrei ha India, ka dang shongdor hi, ha ki 70 khlieh shaneng bad nangne shakhmat, lei ngim tip, la kan dang hiar ne kan dang kiew shuh shuh bad ka sorkar jylla, kam donbor eiei ban tuklar ia kata.
Kumba la batai shakhmat, ba haba ka sorkar, kam don bor ban tuklar, halor ka jingthep briew maphot bad nangta, kumjuh halor ka jing khein dor bai kali; kaba bha eh, ka long ba ki nong pyniaid ia ki kali kamai, ki dei ban ia pynbeit hi para ma ki bad ba kin shim, ia ka dor kaba ki sngew biang ialade.
Lada ki pynkiew bai kali ngi kum ki riew paitbah ngi hap ban iakhih sa ma ngi ym tang ki nongiah kali ba shitom lada ki pynkiew ka jingshitom kawan lut sha ngi u paitbah