Lada lymbub ia u pulit, ka long beain bad lada shah lymbub pat ka shong ain?

Ka jingjia ha ki khyndiat sngi ba ladep, ka la wan rah biang, ia ka jingiakren halor ka kamram u nongshong shnong, ban pyrshah ia ki kam jong ka sorkar, katba kum ki kyndon synshar paidbah bad katei ka mat, ka wan ha ka jingiakren, namar ba ki pulit, ki pynngat kyndon ia ka MP barim bad ka nongialam Congress, da kaba ki kynnoh ba ka leit bat na u kolar jong uwei u pulit.

Ka dei ha ka step jong ka 16tarik Jylliew, ba ka Renuka lem bad kiwei ki nongialam, ki ia mih ban pynpaw pyrshah ia ka jingshah tohkit U Rahul Gandhi, ha ka tnat Enforce Directorate (ED) bad ha ka jing ia pyni bor, ka Renuka, ka bat na u collar jong u pulit ha Telengana bad kumta, la pynngat ia ka, ha ka kyndon 353 jong ka Indian Penal Code (IPC), kaba kynnoh, ba ka pynthut ia ka jingtrei kam u shakri sorkar.

Halor kane ka mat, ka paw shai, kumba ki riew paidbah (imat) kim don hok satia ban ia pyni bor, wat tang ka bor met ruh, haba don kano kano ka jing iakhih, lada ki pulit, ki leit ban khanglad ia ki lada ka long kumta, ka jingpynkut, ka long beit, ba uba long trai ia u pulit, u long u nongjop lane lada iakren ha kawei pat ka kyntien, ka pyni, ba ka jing iaid paidbah, ka jing iakhih paidbah, ka la dei ban duh ban dam noh, namar ba kam don jingmut shuh ban ia pyrshah, namar ba ki kyndon kiba tyngeh, ki la ap lypa.

Ka jingjia kaba la jia ia katei ka nongialam Congress, ha Telengana, kan sa nang pur, sha kiwei pat ki jylla, lada kam don noh kano kano ka jingpynbeit kaba kyrkieh bad lada shim ia kitei ki kyndon, khlem pep, kin don da ki hajar bad ki phew hajar ngut (wat tang ha kine ki sngi ba ladep), ki ban shah kyntur ki iing jongki, da ki puh shilum lane ki ban shah pynngat ha ki kyndon bapher, namar ba ki ialeh pyrshah ia ki pulit ha UP, Bihar bad kiwei.
Ki nongialam sorkar lane ki nongialam sain pyrthei, ki dei ban sngewthuh, ba kum ka ri synshar paidbah; ka India, kam lait na ki jing ia pyneh ne ki jing ia pyni bor, namar ba ki nongialam sain pyrthei hi, ki ju ialam ha khmat ha khmat, haba ki don ialade ha ka liang pyrshah bad kam kut tang katta, hynrei, la ju iohi ruh, ba kiba shah phrang ban kiew kyrdan, kum ki nongialam, ki dei kiba don bynta bha ha kum kine ki jingiakhih.