Ka jingkren jong U Ma Sniawbhalang Dhar, symbud myntri rangbah ka jylla, ha ki khyndiat sngi ba ladep, khlem pep, ka la pynsohkdiah ia U Conrad Sangma, myntri rangbah ka jylla bad wat ia U Himanta Sarma, myntri rangbah ka Assam, namar ba U Ma Dhar, ula kren shai, ba ka jingiasoi soskular pynbeit pud bad ka Assam, kan nym lah ban urlong, lada kam kynthup ruh ia ka jingiakren halor ka Block 1.
Na shibun ki jingiathuh, na ki riew rangbah, la lap, ba ka Assam, ka la shu knieh jubor ia ka Block 1, Block II ha u snem 1951 bad la iathuh, ba katei ka jaka, kaba markhap bad ka Mikir Hills (ha katei ka por), ka don ia ka jingheh kaba haduh 500 square miles.
U Ma Sniaw, ula rah ia ka mat, kaba kongsan bha, ha kane ka jing iasoi soskular bad ka dei ruh, kaba ki kynhun bapher na Jaintia hills, ki ju dawa bha man ka por; hynrei katei ka jingkren, ka buh diengpyngkiang, uba heh bha, namar ba ka jing ia pynbeit pud ha ka kylla kaba nyngkong, ka dei kaba la shu die duh ia ka Assam, ha kaba kiba bun ki jaka, kiba don ia ki trai, kiba don ia ki kot ki sla kiba biang bad kiba hap hapoh ka jingpyniaid jong ki Hima bad ki Raid bapher, la die noh sha ka Assam.
Ka jingkren jong une u rangbah nongialam na Jaintia hills, ka la biang ban pynsngewthuh ba lada ia ka 1951, lah ban khyllie, kumno, ba ym lah ruh ban khyllie ia ka 1952, kaba dei ka snem jong ka jingioh ia ka United Khasi Jaintia hills District Council bad ia ki jaka, kiba hap ha u pud u sam jongki, haduh ha utei u snem.
Hynrei, ka jingshisha, hangne ka paw shai, ba ka jingpynbeit ha ka kylla, kaba nyngkong, kam iaid satia na ki jingshisha, katba kum ka histori halor ka jingdon ki jaka puta, ka jingiasyllok bad ki Syiem, ki Sirdar lane ki trai jaka; hynrei la shu lilam khohreh, haduh 19 square kilometre ia ka jaka sha ka Assam, da ka jingiasylla jong U Conrad bad U bah Prestone Tynsong, uba dei u Chairman jong ka Regional Committee na bynta ka Ribhoi District lem bad ki MLA jong katei ka thain.
Ka jingkren jong u symbud myntri rangbah, ka la dei ban pynkyndit ia shibun ki trai jaka, ki Syiem, ki Sirdar, sha Ribhoi District, sha Jaintia hills bad sha West Khasi hills; namar ba ka jing synshar jongngi ki Khasi, Jaintia dalade hi, ka sdang naduh u snem 1952, da ka jingioh District Council, katba ka jingioh ia ka Meghalaya ha u 1972.
Kane ka mat, ka dei ruh ban pynkyndit ia ki nongshong khappud sha Bangladesh, namar ba ka sorkar India bad ka sorkar Congress, ha u snem 2011, ka la shu nion, da ka jubor, ban aiti ia kiba bun bah ki jaka sha ka Bangladesh, khlem da ia syllok ban ker sainar shiah bad ban pyniakhlad jubor ia ki shi iing shisem, tang na ka daw jong ka jingphiah ia ka Bangladesh bad ka Pakistan ha u snem 1970.
poi rea cheiwon cheiwon leh, ktein heh ki synnae lok,man da ia ta khooh mar khmat wa u Hemanta,,ymem u wi na wot wa nud ki kyaang,,, klam chong heh u synnae. ieh iow iapeit nei ni cha khmat