Ki bor District, ki la ujor ejahar pyrshah ia ki nongialam ka HYC, ba ki leit khynra ia ki iing beain ha Lum Survey, hynrei haba ki bor District, ki la sngew bit ban ujor ia kiba pynpra, hynrei, haba ki leh kumta, ki dei shwa ban ai ia ka jingujor pyrshah ia kitei kiba shong beain ruh, ha katei ka jaka bad ka mat, ka long ba kiba leit pynpra, ki dei ki nongshong shnong ba pura ka jylla, kiba lah ban tip, da ki kyrteng kiba shai bad kiba thikna bad ki dei na ka kynhun sengbhalang, katba kitei ki dei ki poiwir poihap bad kiba ka sorkar jylla, kam don ia ki kyrteng ba pura jongki, ki shnong ba thikna jongki bad na kaei kaba paw kham mynshwa, la iohi, ba tang ka ding ilektrik ruh, ki shu tan tuh na iing jong kiwei pat.
Ka lah ban don ka mat, ba ka long beain ban leit khynra ia ka iing shong jong kiwei pat; hynrei, kaba kham ma shuh shuh, ka long, ba kumno ki briew ki shu leit shong beain ha katei ka jaka, nangta ki thaw iing thaw sem bad haba ka long kumta, ka jingpynshitom kaba jur, ka long shwa ia ki nongsah beain bad hadien kata, sa ia ki nongailad ia kiba leit buhai shnong beain.
Haba ki pulit jong ka district, ki pynhap kyndon ia ki nongialam ka HYC, kumta kajuh ka jingkylli, ka long, ba lada jia ba ki nongialam jong katei ka seng, kim leit khynra, kumta kaei kaba ki bor District kin leh, la kin leit khynra hi ma ki, ne kin shu ieh beit kumto, ba kin ialeh mon kine ki poiei, kumba ki la leh ha Mahadevkhola, ha Laban bad sa kito ki jaka kiba don ha syndah jong ka Iewduh sha Lukier Road.
Mynta ka jingtian bishar, ka dang ap ia ki nongialam jong ka HYC, hynrei katei ka jingshah bishar, kam dei ban ap tang ia ki nongleit pynpra, hynrei, ka dei ban wan shwa ia ki nongshah pynpra bad ka dei ka kamram jong U DC, ba un nym shah ia kitei ki poiwir, ba kin shu jah rngai na katei ka jaka, hynrei, ban tohkit ia ka jingleit shong iing beain jongki, ha katei ka jaka Cantonment bad la ki dei ki trai shnong India ne ioh lehse, ki dei ki poiwir kiba na Bangladesh na Myanmar bad kiwei ki ri ba marjan.
Kane ka mat, ka donkam palat ia ki bor District, ba kin leh mar mar, namar ba lada ki pynslem ia ki nongialam sengbhalang ruh kam lei lei, namar ba ki tip, ia ka shong ka sah, ka shnong ka thaw; hynrei ki tang shu la pynslem ia kitei ki poiwir, kumta ka jingtohkit, kan shu long lehnohei, namar ba kitei kin sa leit wad jaka rieh sha kiwei pat ki jaka, lada dei ha Shillong ne lada ki dei ban leit sha kiwei pat ki bynta jong ka Ri Khasi Jaintia bad ka tang shu long kumta, ka jingtohkit bad pynsaja ia ki kam shong iing beain jongki, kin shu kut tang ha rngai.
Ki Rangbah Shnong ki dei ban shim ks jingkitkhlieh kiba kumno ki briew kiba buhai shnong be aiñ Lada Kim leh eiei te ki Seng Bhalang te dei keiñ ban ia mih ban iada ia ka Jaitbynriew khamtam eh ia ka khyndew ka shyiap. Kumno uta u nongpeit ia ki jaka sorkar um ju leit site inspection seh lah katta phew snem? Haba don kino kino ki jaka rieh jong ki riewsniew dei ban kyndang beit haba ym don nongpeit.
kaba dei kaba phi ong kat kum ka ain.