La kut ka pali ki comedian, sa ka pali u paid Sohiong

Ka la poi artad ka 10tarik Jymmang bad kan dei ka sngi, kaba kmen ia u paidlang ka Sohiong Constituency, naba un ioh ban jied ia la u jong U MLA, hadien ba ki la ia shong khlem MLA, la jan shiteng snem kynthih.

Ka jing kanbas elekshon, ka la kut, hynrei, kaba sngewkhia, ka long ba katei ka elekshon, ka dei pleng ka elekshon ki riew komik, ki riew shutia, ki riew kynthah briew bad kam don ia ka ishu, kaba jylliew bad kaba dei ban ia said ha iing dorbar. Ban iakren ia ka sdien bos, ban iakren ia ka jing pynpait seng, ka jingsam skhim; kitei kim dei ki ishu elekshon bad kaba lyngngoh, ka long ba ka Hima Sohiong, ka don ia u pud bad ka Assam, hynrei, ym don ba nud ang satia shikyntien ruh.

Ki ar tylli ki parti heh, ka UDP bad ka NPP, ki dei ki nongshna drama, kiba triem bha, namar ba ki la ju mlien ia kane ka rukom ialehkai ha ki san snem tam ne duna bad ia katei ngin pynshisha, ba ha ka jing ialehkai ha u snem 2018, ka UDP, ka pynliem kat ia U MLA, ba la ih bha, U Martin Danggo na Ranikor, uba ialeh na ka NPP; ym tang katta, wat U Conrad Sangma, ula kanbas ia ka seng UDP, ha ka elekshon shiteng samoi ha u 2019, ha Shella Constituency bad ngin nym iatih jylliew, ba ki nang mih bun ki jnit ki jnat, halor katei ka mat.

Ka UDP, ka la iatreilang bad u kpa jong U Conrad Sangma, naduh u snem 2008 (lada ngim iakren naduh u snem 1988) bad ha katei ka por, U Dr Donkupar Roy, u long myntri rangbah bad U Conrad Sangma, u long u myntri ka pla pisa bad U Purno Sangma, u shet kylla ia ka UDP, tang shiphew bnai; hynrei ha katei ka por, kam ju don ka jing iakren, kaba pohjait kum ha kine ki sngi.

Ha u snem 2013, ka UDP, ka la ia shong liang pyrshah lang bad ka NCP bad ha katei ka por, U Bah Prestone, u don sha ka liang synshar jong ka Congress; nangta ha u snem 2018, U Conrad Sangma bad U Himanta Sarma; tang mar iadep niew vote, ki leit shong thad sngi ha phyllaw U Dr Donkupar Roy, namar ba ki leit kyrpad kyrpon, ba ka UDP, kan kyrshan ia ka NPP, ban thaw sorkar synrop; hynrei ha katei ka por ruh, ka jingkren tad dor, ia ki kynhun ba iatreilang, kam ju jia, kumba jia ha kine ki sngi.

Kam lei lei, ka jingkanbas paidbah, ka la kut bad ngin sa ia peit, ia ka rai jong u nong Sohiong bad lada u kwah ia ki comedian ruh, u la nang hi ban jied, hynrei lada u kwah da ki khraw jabieng ruh, un sa leh ia la ka bynta; hynrei ka jingshisha, ka paw, ba ka NPP, ka dei ka parti jong ki Garo bad ka UDP, ka dei ka parti jong ki Khasi.