La kut ka jingkwah elekshon MDC 2024

Ka jingkhmih lynti, ia ka elekshon MDC ha Khasi bad Jaintia District Council, ka la kut noh shwa, ia mynta shipor bad katei ka long, namar ba ka por treikam jong kine ki ar tylli ki District Council, kan kut, ha ka 5tarik Lber 2024 bad kumta, ka jingpynlong elekshon hapoh katei ka por, kam iahap shuh satia.

Tang ban pynbna ia ka tarik elekshon, ban thep kyrteng bad ban ia kanbas paidbah, ka donkam shibnai kynthih bad kumta, lada pynbna noh mynta, kan poi sha kaba kut jong U Rymphang 2024 bad kat ban da niew vote, ka la kut noh, katei ka 5tarik Lber 2024 bad kaba sah, ka long, ba ka sorkar jylla, ka dei ban pynjlan ia ka por treikam jong ki ar tylli ki Council, kaba lah ban long 6 bnai lane lehse, da ki don ia ki jingshisha, kiba kham kongsan, ki lah ban pynjlan da 12 bnai bad kaba kham thikna, ka long, ba ka elekshon MDC, kan long hadien ka elekshon MP, lane ha u snem thymmai jong u 2025.

Ki ar tylli ki Executive Committee jong ka Khasi bad ka Jaintia District Council, ki dang sngap jar haduh ha kine ki sngi bad ha ka jingshisha, kitei ki ar tylli ki Committee, ki la dei ban kren eiei ia kane ka mat, lada ki sngew iahap ne em ban pynjlan sa shisnem antad ia ka por treikam jong kine ki MDC, kiba mynta ha kitei ki Council.

Haba shu sngap paidbah, kine ki MDC, kim bit shuh ban dang pynjlan ialade wat tang shisngi ruh, na ka por jongki, namar ba ki la dap pura, ia ka aiom treikam jongki, kaba san snem kynthih bad kumta kim donhok ban dang kam trai, ia ka bhah jong kiwei, da kaba kin long MDC, da 5 snem tam shisngi ruh.
Ka seng Congress bad ka NPP ha Khasi District Council bad nangta ka NPP ha Jaintia District Council, ki dei ban ai ia ka jubab kaba shai sha u paidlang ka Ri Khasi Jaintia, halor kano ka jingshisha, ba ki ailad ia ka sorkar jylla, ba kan pynjlan ia ka por treikam jong ki ar tylli ki Council, namar ba ka jingtreikam paidbah, kam shong ha ka bor jong ki MDC, hynrei, ka shong ha ka mon jong u paidlang uba jied ia kitei ki 58ngut ki MDC ha Khasi, Jaintia.

Kane ka jingleh jong ka sorkar MDA, ka long kum u maw jynthut bad ka jingthombor ia ka synshar paidbah, ia u paidlang ka Ri Khasi Jaintia bad katei ka pyni shai, ba kine ki nongialam sorkar, ba kynthup ia u myntri rangbah ka jylla lem bad u myntri ka tnat District Council, ba ki la khein dewthala, ia ka hok jong uba bun balang.
Ngin dang ia peit ia kaei kaba ki liang pyrshah, kin dang pyrkhat nangne shakhmat, hynrei, ka la dei ia ka UDP, HSPDP, BJP, TMC bad ka VPP, ba kin mih shakhmat ban dawa na ki ar tylli ki EC ha Khasi bad Jaintia bad nangta ia ka sorkar jylla, ba kam bit ban pynjlan ia ka por treikam jong ki Council, khlem ki jingshisha kiba biang.