La kordit tasam, ka shong kali ha Shillong

Ka shong kali ha Shillong, ka la dei ka apot sohsat ia u paidlang, uba leit ba wan, uba mad ia ka jingsahkut kali, kaba da ki bun bun kynta, ha man kawei pa kawei ka jingleit, hynrei ia kane ka jingeh, ym don ba kwah satia, ban weng, namar ba u pulit, u don siren, u ambulance ruh kumjuh, u ophisar ruh kumjuh bad nai iakren, ia ki minister lei lei bad kine ki iaid sahuh bad tynruh katba mon, tang ban lait ialade, ieh u paidbah un mat ia thiah thai, da ki bun bun kynta ha ka lynti ban leit sha skul, sha iew sha hat ne wat sha iing ruh kumjuh.

Ban iaid lynti na kawei ka dong, sha kawei pat ha Shillong, ka la kham jan ban poi sha Guwahati, namar ba lada leit na Motphran sha Nongthymmai, kan shimpor kumba 2 kynta antad bad ka jingdheng kali, ha kine ki sngi, ka la long rukom noh bad ka surok sha Upper Shillong, ka la shu dheng beit man ka sngi bad nangta, ka surok na Motphran, sha Laitumkhrah, Nongthymmai bad ka surok na Lumdiengjri sha Mawlai bad kine ki dei ki katto katne ki jaka, kiba ym don ba kwah shuh ban wad ia ki lad ki lynti thymmai.

Ha ki khyndiat sngi ba ladep, la iohi, ba ka Deputy Commissioner, Shillong, ka la pynmih hukum, kaba khang ia ki kali ban ieng na Motphran sha Khyndailad bad nangta sa ki pulit, kiba pynbeit ia ka rukom iaid kali sha ka lain Polo bad Nong thymmai; hynrei katei kan nym myntoi eiei ruh em, namar ba ka nang pynkyllain shuh shuh, ia ka leit ka wan, namar ba ka jingkhapngiah, kam dei na ka jingiaid bakla, hynrei, ka dei ba ki la bun palat liam ki kali kiba rung sha sor.

Ka tnat pulit lane lehse ka tnat ka kit ka bah, ki la dei ban pyniaid noh mardor da ka jing pynkylla number lane kaba ki ong odd bad even number bad katei ka dei ban treikam, khamtam ha ka sngi nyngkong, kaba dei ka sngi, ba ki bun bha, ki kali kiba kiew Shillong, namar ba kan kham bha, ban buhteng shisngi, ia ka jingleit, ban ia kaba shu thiah thai, da ki 5,6 kynta ha surok bah.
Lait nangta, ka la dei ruh ban kynriah noh ia ki kali kiba wan na Guwahati, ba kim dei ban iaknieh lang ia kajuh ka lynti, ba ki iaid ki nong Shillong, namar ba wat kine ruh, kim kwah satia, ban wan peit ia ka dheng kali, hynrei, ki kwah ban leit peit ia ki jaka shangkai kylleng kylleng.

Kam dei tang katta, kaba i lyngngoh ngain, ka long ba ka jinglong jingman jong ki surok hapdeng ka Shillong bad ka Guwahati, ka iapher ka bneng bad ka khyndew bad kata ka long, halor ka jingmih ki surok thymmai, ka jingheh ki surok bad khamtam ka jingbha jong ki surok, ha kaba ngi iohi, da la ki jong ki khmat, haba ngi rung sha ki surok, kiba don ha pdeng ka nongbah, kum sha Mawkhar, Jaiaw, Mawlai, Laitumkhrah, Nongthymmai bad ter ter, ba ki la bun kiba jot tasam bad ka wan rah ruh ia ka jinglyngngoh, ba lada ka Assam, ka jylla, kaba heh, ka don ia ki surok kiba bha, kumno pat ha Meghalaya, kiba shu jot rathai, kat shaba iaid.

Kaba khatduh, ka long, ba ka la dei ruh ban khang noh ia ki kali ban rung sha Iew Mawlong bad Motphran bad ki kali, kiba wan na Upper Shillong, ki dei ban don ia ka jaka ieng ha shwa ban rung ha Umshyrpi bad kiba wan na Nongthymmai, kin don la ka jong ka jaka ieng bad ba ki kali kiba kamai sor, kin dei beit tang ki city bus lane ki local taksi bad nangta, sa ki kali heh kiba kit bad pynhap mar khia, kiba lah ban rung sha Iewduh.