La kordit ka leit ka wan, ba sniew tasam ki surok sha kylleng

Ki surok ha kine ki sngi, ki la sniew palat liam ha kylleng ka jylla bad la iohi, kumba ym don minister shuh, ym don engineer shuh, ym don kontrak tor shuh, kiba lah ban maramot ia kine ki surok kiba la jot rathai.
Ka surok bah na Shillong sha Jowai, kaba pyniasoh sha Assam, kaba dang shu dep maramot shen, hynrei mynta, ka la pharia lut lyngkhot lyngkhai, ka surok na Shillong sha Dawki, ka la shu kylla long ka kam thok kam shukor ia u luk u lak, ka surok sha Mawkyrwat, ka surok ha Iew Mawlong bad nangta sa sha Garo Hills, lei ynnai iakren shuh.

Ki bor shnong lem bad ki seng bhalang, ha ki khyndiat sngi, ba ladep, ki la leit khang ia ka khyrdop lum khajna ha Lumshnong, hynrei katei ruh kam mih soh eiei satia.
Ka don sa kawei ka mat bad kata ka long, balei sha, ba ka sorkar jylla, ka leit lilam lut ia ki surok lajong sha ki kompeni jong ka sorkar India, kiba kynthup ia ka NHAI bad ka NHIDCL bad kaei ka daw, kaba don ha lyndet jong kane ka jingdie duh noh ia ki surok bad ki jaka puta sha kitei ki kompeni?

Ba kan da long ha kane ka dur, ka la dei ia ka PWD, ba kan khang tala noh, ia ka National Highway Division bad ba kan shu aiti lut khait ia ki surok sha ki kompeni jong ka sorkar India.
Kine ki kompeni, ki lum tyngka, da ki phewlak ha ka shisngi, na ki surok bah, lada dei ka surok Shillong Guwahati, nangta na Shillong sha Ratacherra; hynrei kim mon satia, wat tang ban pyndap khyndew malu mala, ha ki surok, kiba don da ki thliew ki syar, ki khohruh khohram bad kim salia satia iano iano ruh, namar ba kim dei kiba pyniaid da ka sorkar jylla, hynrei, ia ki, la pyniaid da ka sorkar India bad ki dei ki kompeni, kiba la thaw hi, da ki myntri jong ka sorkar India.

Ha kat kane ka suhsat, hynrei ka sorkar jylla, ka shu peitkai narud bad ngi donbok, ba ka don ka Meghalaya High Court, kaba tangon ia kine ki kompeni, hynrei, ban da dei lei bym don sa ka High Court, kumta ka leit ka wan, da ki kali paidbah, ka la wai syndon bad kiba lah ban iaid, kin dei tang ki MLA/MDC ki minister, kiba iaid da ki kali kiba shongdor, da ki bun phew lak.

Ka don sa kawei ka jingeh bad kata ka long, ba ki surok bapher ha ka jylla, la shu pyntrei da kaba shim ram bad kine ki Bank, lane ki kompeni bapher jong ka pyrthei, ki ju jied hi, ia la ki jong ki kontraktor bad ka wan ka mat hangne, ba kumno ia ka ram, yn siew ki paidbah, kiba leit ba wan, da kaba kin shah khrong khajna man ka sngi, katba ia ka kam, yn rai hi, da ki kompeni jong ka sorkar India bad kane ka la pynduh kam ia ki trai shnong, lada dei ki kontraktor ne ki nong bylla bad nangta, lada kine ki kompeni bar jylla, kim sngewbiang ruh, ki shu ieh jyndat ia ka kam, kumba ki la leh ia ka surok Shillong Tamabil.