La jan kut ka jing ia bam doh masi

Ka juk bam doh masi, la imat, kumba ka la jan kut bad nangne shakhmat, la iohi, ba kiba kwah ban bam doh masi, kin dei noh tang kiba ioh ba kot. Katei ka long, ba ka dor jong ka doh masi, ha kine ki sngi, ka la kynjoh sha ka T.500 tam shi kilo bad ka la rem dor shibun, ia ka doh sniang.

Ha ki khyndiat sngi, la iohi, ba ki don ki seng bhalang, kiba nabar jylla, kiba leit talasi ia ki kali kit masi sha Iew Khanapara bad lada iakren ia ka jingdie bad thied masi, ka dei ka mat, kaba la long beain lypa, namar ba ha India, ka don ka ain, kaba khanglad ban shoh doh masi bad lada ong ban ia thied masi, da ki kali, na ka bynta ban pynkha khun, ban ia pynbam phlang ha ki lum Khasi jongngi, kam don jing ia dei satia bad kumta, ka la dei beit hi, ka jingthmu ban shoh doh bad haba kumta, ka dei ka jingdie, kaba la khang lypa, ha kaba kiba bun ki jylla, ki la dep buh ruh, da ki kyndon kiba tyngeh, ia kiba shoh doh masi.

Haduh mynta, ngim don satia ia ki masi lajong, ba ngi ri, kiba lah ban pynbiang ia ka jing donkam doh, kaba man ka sngi bad kumta, ngi hap ban shaniah, lyngba ka iew Khanapara, na ka bynta ka jing ot doh; hynrei, lyngba ki ain kiba la nang teh pyrkhing sha Assam, Bihar bad sha kiwei de ki jylla, kumta ka la eh than ban pynpoi ia ki masi sha ka jylla bad ka dei namarkata, ba u ba ot doh ruh, ula dei ban long hi u sheikh ka Ri Khasi bad uba bam ruh, u dei ban long sa u kpa jong u sheikh.

Katei ka dei kaba jia ia mynta, hynrei, ha ki sngi ki ban wan, la iohi, ba kan sa mih ka kyndon, ha kaba yn khang ban ot doh masi, ha kylleng hi ka Ri India bad ha katei ka por, ka jing ot bad bam doh masi, kan kylla long ka kam tuh bad ka ka kam beain bad hangta, ka jing ia bam doh masi, ka la wai syndon.
Ki don bun kiba la mad ia ki jingeh bad ki jingshah pyn saja, namar ba ki die masi, ki pyniap masi, ki buh doh masi ha ki iing jongki bad kitei kiba ju im, ha katei ka kam, kin sa shong khlem kam bad duk ksew, lada kim pyrkhat noh da kiwei pat ki kam.

Ka jingduh ia ka kamai kajih, kam dei shuh kaba rit, namar ba ka masi, kam dei ba ka dei ka mar kaba bam tang ha ka jylla, hynrei, ki don bun bah kiba shalan shabar Ri, lada dei ia ka masi kaba im lane kaba la dep shoh doh; hynrei katei ka la kut bad ka masi, ka la kylla blei.