Ki heh ka TMC, ba kynthup ia U Saket Gokhale, u nongkren jong katei ka seng sain pyrthei, u da thrang hir hir ban iatainia bad ki heh jong ka sorkar MDA, khamtam ia U Bah Prestone Tynsong, uba dei u nongkren jong ka sorkar bad haba kat utei u heh jong ka seng ba khlain bor ha India, u kwah iatainia, ka pyni, ba u la ithuh ia ka seng NPP ruh, kum ka parti heh, wat la ka don makna tang kawei ka MP ha Lok Sabbha.
Ka jing ia tainia, ka dei kaba ki ju leh bha ha kine ki sngi, tangba kam mut ruh, ba haba ia tainia, ban iashoh ne ia lympat, kumba ialeh wrestling, hynrei ka dei ban ia sei la ki jingshisha, hapdeng ka kynhun iatainia bad lah ruh ban pynshisha, ba ki news channel ha Delhi, ki kiew bha ki nongpeit jongki, ha ka por 9baje mynmiet, namar ba ki don kine ki jing iatainia, hapdeng ki kynhun bapher halor ki ishu ba bun bah.
Kumba la kylli, da U bah Prestone Tynsong, nongialam kane ka sorkar bad u heh NPP, ba ka seng TMC, ka don ne em, ia ki nongkren jongka, na ka jylla bad katei ka jingkren, ka thew lehse, ba lada iatainia, yn hap iatai, halor ki ishu jong ka jylla, ym bad ki ishu, kiba dei shabar jong ka jylla, lane lada iatai, yn hap ban iatai ha sawdong jong ka met jong U Mukul Sangma, uba dei u myntri rangbah barim bad uba ialam mynta ia ka seng Trinamool.
Lada iathir ha katei ka mat, kan dei shisha, kaba pynhun jrut ia ki paidbah, kiba sngap bad hap ban ia khyllie ia ka ishu shah siat iap ki 4ngut ki rangbah Khasi ha Langpih, nangta hap iakren ia ka jingshah siat iap, ki riew paidbah ha Mookhep, na ka jing iakhih pyrshah dewiong, ha u snem 2014 bad nangta, yn iakren ruh halor ka rai jong U Mukul Sangma bad ka kynhun myntri jongu, ban kyntait ia ka mat ILP, nangta ka jing pynduh bor ia ki Rangbah Shnong bad nangta, ka jingkhang dewiong bad sa shibun kiwei, kiba U Mukul Sangma myntri rangbah, u la leh ha katei ka por bad ka kynhun, kaba u ialam hi ma u.
Kumta, lada ka jing iatai kan iaid halor kitei ki mat haneng (wat lada ia klet ia ka ishu MBOSE), kan jin da la long kaba donkam kyrkieh ia ka jing ia tainia, hapdeng ki heh jong kane ka sorkar NPP bad ka kynhun jong U Mukul Sangma, namar ba ki paidbah, kim dei ban klet kloi ia ki jing tyllun ka politiks, ha ki khyndiat snem ba ladep.
Ka jingbym suidniew ka Sorkar Congress mynshwa hapoh ka jingialam u Mukul Sangma ba bun ki jingeh kiba ktah ia ka Ri bad ka Jaitbynriew jong ngi, Khasi, Pnar bad Garo. Hato uta U Mukul Sangma u dei shisha u Nongialam na ka bynta ka Jylla??? Lada u sngew kumta Balei u wanrah da ka TMC ha Meghalaya? Balei ioh mon u Abhishek Banerjee bad u Saket Gokhale? Ka daw ka dei na u Mukul Sangma bad ki Nongbud jong u, kiba kynthup ia u MLA ka Umroi, MLA Nongthymmai bad kumta terter. Lada ngi ailad ia ka jingwan tur ka TMC ha ka Jylla jong ngi, ka jingma ka la ap lupa namar ka dei ka Seng kaba bun Tam ki scam ha ka history jong ka Jylla West Bengal bad ka illegal immigration na ka bynta ban klun votes.
Khublei.