Reservation: La dei sa ka pali ban iathir noh ha miej, ym shuh ha surok

Ka sorkar jylla, mynta ka la mynjur, ban iakren syndon ia ka mang, halor ka bhah kam bhah jam lane ka reservation policy bad ka la ai bor ia ka komiti, ba la khlieh, da ka kong Ampareen Lyngdoh, ba kan iakren ia ki seng sain pyrthei, ki sengbhalang bad ki kynhun bapher, halor katei ka mat, kaba ka seng VPP lem bad kiwei ki seng sain pyrthei bad ki sengbhalang, ki la ju kren bha.

Ka rai jong ka sorkar jylla, ban iakren, halor ka reservation policy, khlem pep, kan pynhun mynsiem, ia U bah Ardent Basaiawmoit, uba la shah thngan bun sngi, halor katei hi ka bynta bad haba ka sorkar, ka la mynjur ia katei ka mat, ka la dei ia ki dkhot jong ka komiti, ba kin ia shong bad ba kin iakren, da ka jingkyrmen, ba kin ioh ia ka rai kaba bha tam, halor kane ka mat kaba kongsan eh; hynrei hap sngewthuh ruh, ba katei kam dei ka rai kaba shisngi, lane ban shong tang kawei ka jingialang, namar ba ka dei ka mat, kaba hap ban iakren ia shibun ki kynhun, khamtam lei ia ki trai shnong ba pura jong ka Jylla, lada dei ia ki Khasi, ki Jaintia, ki Garo bad wat ia ki stad jabieng ne ki stad ain; namar ba ia katei ka mat, ym lah ban shu ia rai muk mak, khlem da ia syllok ia ki kynhun bapher.

Ka lynti kaba bha tam, ka long, ba haba ka sorkar jylla, ka la mynjur ban iakren ia ka bhah kam, ka la dei ban don ka jing ia sngew shaniah iwei ia iwei pat bad haba ka long kumta, U bah Ardent, ula dei ban sangeh shwa shipor arpor ia ki prokram jing iakhih jongu bad ban duriap, na ka bynta kane ka ishu kaba don ha khmat.

Kin don ki ban sngew shngain, ba lada ka wan ka 80 lane ka 100 percent, ha ka bhah kam, ba kan don ka jing ia sam kaba mar ryngkat, lane ba uba bit duh, un ioh ia ka kam; hynrei katei ka dei tang ka jingmutdur kynsha, namar ba lada kim don ki kyndon kiba shngain, katei kan sa nang pyn iashut bad ia pait jaitbynriew bad kawei na ki jingshisha, kaba ju paw bha ha kine ki sngi, ka long ba ha ki eksamin, jong ki District Selection Committee (DSC), la ju plie lad nyngkong ia ki trai shnong jong ki District bad haba ka long kumta, ka kyntien jaitbynriew, ka duh noh, namar ki trai shnong, ha ki jaka ia khleh, kum ha West Khasi Hills, Ri bhoi District, kin dawa ia ka pasoh.