La dei ban trei noh ha ka sngi Saitjain, ha ka jaka jong ka Sngi U Blei

Ka sngi U Blei, kam dei tang ka sngi leit jingiaseng, hynrei ka dei ruh ka sngi shongthait jong uba bun balang ha satlak pyrthei lane ka sngi kut taiew (weekend) bad ka dei ruh ka sngi, kaba ki briew, ki iakynduh ia la ki khun ki kti, kiba ha iing ha sem.

Hynrei ha kine ki sngi, la iohi, ba ka sorkar India bad wat ka sorkar Meghalaya, ka ju shna prokram bha ha ki Sngi U Blei.
Dangshen u myntri rangbah, u don ha ka jingialang ki nongtrei Bank ha ka Sngi U Blei bad kito kiba bud ia u, ha ka twitter, ki iohi, ba ha ki Sngi U Blei, u leit peit ia ki shnong ki thaw, ki skhim bapher jong ka sorkar.

Ka ain bylla jong ka sorkar India, lane kaba ki ong labour laws, ka buh ia ki kyndon ba u briew, un trei 48 kynta ha ka shitaiew lane lada iakhein ia kata, kan long 8 kynta ha ka shi sngi bad kam dei tang kata, la ju bthah ruh ba u nongbylla, u dei ban ioh shongthait shisngi ha ka shitaiew lane kaba ki ong ha sngi nyngkong jong ka taiew, kaba dei ha ka Sngi U Blei.

Ki don ki briew, kiba leh khnang, lane kiba pynkhein ia ka Sngi U Blei bad ha kine ki sngi, la iohi ia shibun bah ki jing pynkhein ia ka Sngi U Blei, ha kaba ki eksamin wad kam ruh, ki long ha ki Sngi U Blei, ki prokram ba donkam jong ka sorkar, ki long ha ki Sngi U Blei bad haba kren ia kane ka mat, la iohi, ba kam dei ka jingkhanglad ia kano kano ka kynhun ki nongshong shnong, hynrei ngi hap sngewthuh ba ki nongtrei sorkar ruh, ki donkam ia ka sngi shuti, kum ka Sngi U Blei, namar ba ki don ia ki iing ki sem, ki paralok parajor, kiba dei ki nong bylla sngi, ki nongtrei iing, ki daju bad kumta ter ter.

Lyngba kine ki jingjia, kiba iai thaw prokram bapher ha ka Sngi U Blei, ka la dei namarkata, ia ka sorkar India, lane ka sorkar jylla, ba kan phai biang sha ki sngi treikam ha ka taiew kaba nyngkong bad kaba lai jong ki Sngi Saitjain bad ha kitei ki sngi, lah ban pynlong ia ki prokram bapher bad ki nongtrei ophis lane ki riew paidbah, ki don por ban iashim bynta lang.
Ka sorkar jylla, lada kam ailad shuh ia ki nongbylla sngi, ki nongniah kali, ki nongtrei iing, ki samla pule bad wat ki nongtrei ophis sorkar, ba kin shong shuti shisien ha shitaiew, ka pyni noh, ba ka la pynkhein ia ka labour laws.