Kynriah shi kynriah, ka ialeh kam pulit

Ka tnat kam poh iing ka sorkar jylla, ka la pynbna ban thung kam pulit, da ki hajar ngut; hynrei kaba pyn diaw mynsiem, ia ki samla kiba kwah ia katei ka kam, ka long ba ki la shu jlep noh, ha ka jing kilan met, namar ba la shu iai buhteng shi buhteng ia ka jing ia mareh, ha kaba la ai daw halor ka jingdon ki kyndon jong ka khlam covid.

Ka tnat pulit, ka la tip bha, ia ka jingdon kane ka khlam, kaba la don hangne la shisnem tam, hynrei kumno kam sngewthuh ban pynkhreh ialade, ia katei ka jing iada (lada donkam) bad ka long hi ruh, ka bym sngew iahap ban ai daw ia ka khlam, haba ha Assam, la lum ia u paidlang ban kanbas elekshon, hynrei ngim iohi, ba kan don ka jingteh kyndon bad nangta, haba ki kandidet ialeh MDC, ki ia lum paidbah sha Garo Hills bad hangtei ruh kam don kano kano ka jingteh kyndon jong ka sorkar bad kumta kaei pat, kaba khanglad ia ki pulit, ba kin lum ia ki nong ialeh interbiw bad kane ka dei kaba hap ban ia buh dak jingkylli pynban.

La iathuh ba ki don da kumba shi lak ngut antad, kiba ia kwah kam pulit bad kitei ki shilak ngut, ki hap ban ia mareh lut khoit bad kumta, lada ia mareh tang shi hajar ngut shi sngi, kumta kan shim por, kumba shiteng snem eiei bad halor kane ka la dei ia ka tnat thung kam jong ki pulit jylla, ba kin pynsuk ia ki samla wad kam, da kaba ailad ba uba na Shillong, un ia mareh ha Shillong, uba na Jowai, ha Jowai, uba na Nongstoin ha Nongstoin bad kumta ter ter bad kane kan pyn duna ruh ia ka jing ia lum lymbung, kumba don ka jingthmu mynta, ban pynlong tang ha Mawiong.

Sa kawei, ka bym lah ban sngewthuh, ka long ba ka jingrung kam pulit, ka dei beit, tang ka jing iakob mareh bad ngim tip, la kine ki pulit, kiba mynta, ki ia khlain haduh katno ban mareh, naduh ki pulit langrut, haduh ki SP, ki DIG, U DGP bad kiwei bad lah ruh ban batai ba ki pulit, kim dei baroh lut, ki ban ia mareh, namar ki don kiba don ha ka tnat syntiat, kitei ki hap mareh ki khmat jongki, ban ia kaba mareh ki kjat, ki don kiba trei ha ka miet ka iong; kumta kitei ki dei ban long kiba khlain peit miet bad nangta, ka donkam ruh ia ka jingproh jabieng jongki, khamtam ia kito kiba iakhun ha ki kyrdan, kiba kham heh bad ka jing ia mareh, ka dei ban long tang kawei ka test, ban iohi, ba kiba kwah ia katei ka kam, ki long kiba koit ba khiah.