Kwah pyn kohnguh jubor ia ka Star Cement?

Laisien lai wat, ka Star Cement, ka la rem ban pynurlong ia ka jingthmu jongka, na ka bynta ban nang pynheh bad ka sobjek, ka la dei ban kut noh katto bad katei ka kompeni, ka la dei ban hun, ha la i jong i jaka barit jongka, ban khlong ia u mawshun, katba u dang don; hynrei lada um don shuh, ka la dei ban lum la ki tum ki tam bad leit phai iing noh.

Hynrei kaba lyngngoh than, ka long ba balei ka sorkar Jylla, ka hap ban iai pynlong shi pynlong biang, ia kata ka jing ia sngap paidbah, haba ka iohi, ba ki laisien, ki la pheil? Ka la dei ban wad ia ka daw, bad haba la rem, la dei ban hun bad kam dei ban iakhun shi iakhun biang, kam don satia ka ain.

Laisien lai wat, ka Star, ka la rem bad u paidlang ka Jaintia Hills, ula ngiah shoin ia katei ka kompeni bad kaei kaba dang donkam shuh ban iakren, haba lah pyrshang ha madan ruh ym long, lah pyrshang ha phyllaw bad sa kaei bad haei ba kin kin dang kwah ban pyrshang shuh shuh bad kane ruh, ka jingleh, ka la kylla long pynban, ka jing pyntian jubor ia ki nongshong shnong ka Jaintia Hills, ba katba kim pat kohnguh, yn hap shi hap ban khot dorbar bad sa katno spah sien, yn pynlut ia ka por bad ka bor u paidbah, ia ka por bad ka bor ki ophisar bad ia ka bor bad ka bor ki pulit bad kumta ter ter bad kane ka dei ka buit kaba jaboh than bad kam ju jia ha ka synshar paidbah, ba tang namar ba u rem u kandidet jong ka liang sorkar, ban pynlong elekshon biang da ki phew sien.

Ka sorkar jylla, ka la dei ban sngew lehrain ialade, ba ka la nud ban bom lathi bad siat tiar gas ia la ki jong ki nong shong shnong ba ieid, na ka bynta katei ka kompeni.

Hai re hai, kaei ka jingsngew jong kito ki nongmihkhmat na Jaintia Hills, ba ki pyntuid ia ka snam jong ki para ri, tang namar ba kim pdiang ban ailad ia katei ka kompeni, ba kan nang kurup jaka shuh shakhmat bad kitei, la imat, kumba ki kwah ban pynjot thiaw ia ka thain Lumshnong baroh kawei bad ka jing lalot bad ka jingkwah pisa kam ju hun satia lano lano ruh.

U myntri jong ka tnat karkhana, ula dei ban sngew lehrain bad hiar shuki mardor, namar ba u bom lathi ia la ki jong ki nongthep vote, na bynta katei kawei ka kompeni bad katei ka dei ban long ka jubab kaba biang bha ha u snem 2023.