Kwah ki kynthei, ban iashim bynta ha ki dorbar shnong

Ha ki khyndiat sngi ba ladep, la iohi, ba ka kynhun ki seng kynthei, ka kwah ba ki kynthei, ki dei ban ia shim bynta lang ha ki dorbar shnong bad katei ka pyni, ia ka jingsngew kitkhlieh jongki, na bynta ka shnong ka thaw.

Hynrei hangne, ka wan shwa ka mat ia ka kyrdan kynthei bad longkmie, namar ba kynthei, wat i khyllung ba dang shu kha, ki ong khun kynthei, hynrei longkmie, ka mut ia kito kiba la don la ki khun ki kti, kiba la longkmie ne long mei ieid ne long meikha bad kumta ter ter bad kumta ka jingmut, kam dei (tharai) ia ki kynthei, hynrei, ka dei ia ki longkmie, kiba la ih ka pyrkhat pyrdain.

Ka jingshong dorbar jong ki longkmie, kam dei ka mat, kaba thymmai; hynrei, ka dei kaba la don ha ki katto katne ki dorbar shnong ha Shillong, katba ki dang don bun bah, ki shnong, kiba ki longkmie, kim pat don bynta bad katei ka dei ka dustur kaba naduh hyndai, ha kaba ki longkmie, kim pat ju don bynta ha kitei ki dorbar shnong bad lah ban ong ruh, ba kim pat ju dawa satia, haduh ha kine ki sngi; hynrei katei pat kam thew ruh, ba ka don ka jingleh niewbein ne leh shiliang khmat ia ki longkmie jongngi, da kaba kim don bynta ha ka dorbar.

Ki don bun bah ki Hima Khasi lane ki Dolloi ha Jaintia hills bad kitei ki don ia ki mahadei lane ki tnga jongki; hynrei, ha kaba iadei bad ka dorbar dorshar, ki mahadei, kim ju kwah ban leit shim bynta, wat la ki dei kiba la niew burom haduh katta katta.

Ngim tip shuh, ia kaei ka daw tynrai, ba ki longkmie ha ki pateng ba mynshwa, kim ju shim bynta satia ha ka dorbar shnong ne dorbar hima (wat la ngi don ia ki kynthei kiba shlur, kum ka Phan Nonglait) bad la iohi, ba ia katei ka dustur; wat ki phareng, ha ka por, ba ki wan synshar ia ka Ri Khasi, kim shym la lah satia ban pynkylla bad ban ailad ia ki longkmie ba kin long ki nong iasaid ha ki dorbar hima bad kiwei.

Kam dei tang katta, la iohi shuh, ba wat ha ki balang, ba la wan rah da ki phareng ruh, ba ki kynthei ki don la ki jong ki jing ialum ne ki jingiaseng, hynrei ha ki jing iaseng paidbah, ba ki ju ailad ia ki rangbah, ba kin long ki nongialam, ki nongkren bad ia ki kam ba kongsan, ba kin lamkhmat.
Ki ain, ki lah ban pynkylla, hynrei ka sobjek, ka dei kaba maian haduh katta katta, ha kaba ka Bible, katba kum ka kitab u genesis, ka ong ba U Blei, ula thaw ia u Adam, ha ka dur jongu hi bad hadien kata, u sa thaw ia ka briew, namar ba u Adam, um dei ban sah marwei ha kper Eden.