Kwah ILP, sa ka Congress

Wat la ka politiks, ka dei ka kam kaba bha, kaba shongnia bad kaba shong ain, hynrei ka shu mih noh, ka jingkren pynbudnam, ba ka dei ka kam jaboh, na ka daw, ba ki don kum kine ki jingkren khlieh khlieh tdong tdong bad kane ka dei halor ka mat inner line permit bill jong ka seng Congress.
Ka kham sting toi ka jingkren, ba ka dei ia katei ka sobjek, hynrei, ban da dei ia ka tnga, ki la ong, ba dei uba klim tnga, lada dei ia ka kam niam, ki long uba klim niam bad ban da dei lei, ha ki kam seng bhalang, la shah jer syndon, da u ingkhong shyllangmat.

Wat la kiba bun kin bein ia ki jing kylla ktien ka Congress, hynrei, ym baroh, ki ban bein bad kin don bun ruh ki ban iaroh, namar, ha kaba kum kane ka khep ia shoh tyndep ILP, lada phim nang lang ban kren ha kajuh ka sor, kumta phin shah bein shah khoh bad kumta ka Congress, kum ka seng, kaba la rim tam, ka nang ban sei noh ia ki snep, kiba tngit jongka, bad mynta ka kren lem ia ka sur jong ki sengbhalang.

Ki nong ialam sengbhalang, kiba la kham rim, ki kynmaw bha, ia ka jingeh jong ka jing iakhih paidbah ha u snem 2013, hadien ka elekshon MLA, ha kaba ki nong ialam jong kitei ki seng, ki la dei ban phet krad bad phet rieh ialade, haba ki shah thwet ha ka sorkar Congress, ha katei ka por bad ha ki jingiakren ba bunsien ruh, ka la shu iaid, tang halor kata ka kyndon ai wai iing, lane ka kyndon ia rung ia mih bad kam ju mih satia ka sobjek ILP bad kam kut tang katta, hynrei ngi kynmaw ia ki jingshah khot hajir, kiba la shu leit tah ha ki jingkhang iing jong ki nongialam, ka jingshah kem jong ki 70-80ngut antad bad nangta sa ka bai lutksan, kaba ki nongialam sengbhalang, ki hap siew kumba T.30klur tam.

Kam lei lei, haba ka seng Congress, ka la kyndit bynriew ha kine ki sngi, namar ba kam ju don ka jingkut ban kylla kaba mut, lada dei ha ka niam ne ka politiks, katba u saihon, u dang mih tdem; hynrei ban iakren ia kane ka mat, ngi hap ban kren shai ba seng Congress, ka la pyn lehnohei ia kata ka mat, kaba la sdang ia tuklar, naduh ki snem 1980 bad ha kaba katei ka seng, ka ju don ha ka jing synshar ha ka jylla lem bad ki paralok jongka, kum ka UDP, HSPDP bad kiwei de ki seng tit, la kumba 35 ne 40 snem, ba ki bat ia ki sorkar bapher ha ka Jylla.