Kwah ban heh kpoh, ne ban heh jabieng?

Namar ba ka elekshon MLA, ka la nang hajan eh, kumta ka la dei ia ngi ba ngin ia kylli ialade, ia kaei ka jingkwah, kaba ngi don ha ka jingim jongngi bad kata ka long “Ngi kwah ban heh kpoh ne ban heh jabieng?” lane ha kawei pat ka kyntien, kaba ki ong “Lah ka dohkha ne lah u ryngwiang ban khwai dohkha” bad kane ka dei ka jingkylli, kaba mih ha kine ki sngi, ha ka jing pynkhreh ia ka elekshon, hynrei, ngi hap ban kynmaw ruh, ba katei kajuh ka jingkylli, kan jah noh, tang shu la shongshit ka jing ia kanbas, namar ba kan shu lieh shaid, ka tyngka U David Scott, ban pynbieit ia ki shipai ka Hima Khadsawphra.

Ka sorkar MDA lane ka sorkar NPP, ki la ialam mynta, la saw snem lynter bad ha kine ki saw snem, ki la pyni, ia la ka jong ka bor bah jongki, ha ki kam ki duk bapher; hynrei ha kaba kum kane ka por, ka dei ruh ia u paidlang ka jylla, ba un kylli, ia kiei ki kam, ba ki leh, na bynta ka lashai jong ki khun samla ne jong ka jaitbynriew?

Kaba kongsan, ka long ruh, ba ngi hap ban kynmaw, ba ki skhim, kiba wan sha ka jylla, ha kine ki sngi, ki dei baroh kiba wan na ka sorkar India bad kam don kawei ruh ka skhim, kaba wan na ka sorkar jylla bad namarkata, haba ngi thab kti, ha ki jingplie ia ki skhim sorkar, ngi dei ban thab kham sawa, ba ka ka sur, kan her shaduh sha Delhi.
Ngi sngewkmen eh, haba ka jingiakren kam pud, ka la nang iaid, ka ishu them metor, ka la nang iaid, ka ishu dewiong bad sa kiwei de ki mat ba bun, hynrei ka mat kaba ha khmat duh, ka dei halor ka pule puthi, ki khun jongngi, kiba la mad da ka nusip jot jong ka online class bad kine kin poi shaei ka lashai jongki, kam dei tang katta, ngi iohi ha kine ki sngi, ia ka jing iakhih ban pyn kylla ia ka 40 percent ka bhah kam bhah jam, kaba la rung haduh ha ka bhah pule puthi ruh.

Ki kmie ki kpa, ki pynlut da ki lak bad ki phew lak, na ka bynta ban pynnang pynstad, ia la ki jong ki khun; hynrei ngi iohi, kumba ka jingstad jongki, kam myntoi eiei ruh, hynrei, ka long pynban, tang ka jingduhnong ia kato ka longiing, namar ba ki hap ban ia bhah, mar shiteng hapdeng U Khasi bad U Garo bad mynta lei, la tyllep sa u dkhar, ha ki ophis bapher, khamtam ha ki jong ka sorkar India.
Ngi la klet bad ngi la shah tyllep, ka jing iatip lem jongngi, la kumba shah ber khaw ha u menshohnoh bad ha shwa ka elekshon 2023, to ngin peit ia ki skhim, kiba wan ha ki Constituency jongngi, la ki dei ban heh khlieh ne tang ban heh kpoh pynban??