Kurup naphang ki shipai ia ki jaka puta

Haba ki khyrwit ki shipai ha lynti sha Mawshbuit, ngi ia kyndit tyngeh bad khih bitar, hynrei ngam tip, la kitei ki shipai ki leh kyndit, ne ki la da dep ai jing maham lypa; hynrei ha hynniew mer, te ki la dep thoh lypa, da kaba shai, ha kaba ki ong ha ka ktien phareng “tresspassers will be shot” lane kiba rung beain, yn shu siat.

Ki shipai suin, ha hynniewmer bad ki shipai khyndew ha 101, ki la dep leh, ia la ka jong ka kam bad kata ka long, ha kaba ki la knieh noh ia ka jinglong trai ia U Lum Shyllong, hynrei ym don ba salia eiei ruh em; ki la knieh noh ia ka surok kali, kaba ki ju iaid kjat ki riew paidbah na 101 sha Rilbong Police Point, ki la knieh noh ia ka jaka ialehkai ha Lummawbah, nangta ki la knieh noh ia ka surok kali ha Rhino, ki la knieh ia ka madan Kyrkit, ki la knieh ia ka lynti iaid kjat na Anjalee Cinema sha Khyndailad, ki la knieh ia ka lynti sha Khlieh iew bad mynta, ki la knieh sa ia ka surok kali, ban leit sha Mawshbuit.

Kam dei tang katta, hynrei, ngi iohi, ba kumno ki jaka shipai ha Lukier Road, lane kiba don ha syndah ka Khlieh iewduh, nangta ki bynta jong ka Anjalee, ba ki shipai, ki la lilam sha ki dkhar bad kitei ki jaka, ki la kylla long ki paki ki dulan bad ki kad khaii, kiba la i shyrkhei ban peit.
Hynrei kim pat hun bad mynta, ki dang skud jaka ter ter, sha kiba bun ki bynta jong ka Ri Khasi Jaintia bad kaba ima, ka long mynta sa ia ki shnong khappud, ha kaba ki don ki trai jaka, kiba la lot pisa bad sa ka jingbieit jong ki shnong ki thaw, ba ki ailad sa ia ki BSF, ba kin thaw ktem ter ly ter, ha kitei ki jaka khappud bad la iohi, ba ki khappud, ki la shlei mam, da ki ktem BSF suda bad kitei kin sa buh jingeh ha ki sngi, ki ban sa wan, ia ka leit bri leit sah, ki trai shnong sha ki khappud.

Katei ka mat, haduh mynta, kam pat dei ka mat, kaba ki paidbah, ki shim khia, kumba ki iakren ia ka ILP, them metor, hynrei ka shu mih, ha kiba kum kine ki khep, haba ki shipai, ki pyni bor ia ki riew paidbah; hynrei ngim iohi, ia uwei ruh U MDC, U MLA lane U MP, u ban ia said, na ka bynta ka jinglong trai jong ki paidbah ia la ki jaka puta; hynrei ka jingeh, ka long ba ka sorkar, ka la kylla long ka nongthied khyndew bad sa shu ai ei, sha ki tnat sorkar bapher bad katei ka dei ka jingjia, kaba pyn pangmet jur ia ki trai jaka, kiba la shah knieh jubor ia la ka nongkynti.