Hadien, ka jingkyndang jong ki bor District Council, ia ki dukan jong ki dkhar bad khamtam ki nongdie madan lane ki khar die shana, la iohi, ba ki Khasi, ki la leit kurup ia kitei ki jaka ban shong die jingdie noh dalade.
Sngewtynnad ia katei ka jingleh, tangba hap ban sngew thuh ruh ba ka jingdie madan, ha ki lynti iaid briew, ka dei ka kam beain, namar ba ka pynthut ia ka iaid ka ieng bad ka leit ka wan jong kiba bun.
Lait nangta, lada ngi iakren kham iar ia kane ka mat, ka la dei ka por, ia ki trai shnong, ba kin shim lut ia baroh ki kam dalade hi bad kawei na ki nuksa, kaba ngi dei ban iohi tyngkrein, ka long ba kumno ki kharmetor, ki pyneh ban mih na iew Mawlong bad katei ka dei na ka daw jong ka jingshong slem jongki bad ba ki wan ban trei kam, kum ki nongkhat jaboh bad ha Iewduh, kumno ki dkhar, ki leit rung ha katei ka iew kyntang jong u khun u hajar, hangtei ruh, ka dei hi na ka jing ailad ki trai dukan, ba kin rung ha katei ka iew.
Ha ki phew snem mynshwa, la ju kynmaw, ba ki Khasi, kim ju kham treh ia ka kam pulit bad wat haduh ha kine ki sngi ruh, bun kiba dang kiar ia ka kam shipai bad kam dei tang katta, kiba bun na ki samla jongngi, ki ia beh, ia ki kam kiba suk bad ki kwah ia ki kam, kiba trei mynsngi bad ioh wan phai iing noh mynmiet bad don ruh kiba shim, ba lada u khasi, u shah kynriah kam sha Garo hills, katei ka dei ka jingleh tamsneng jongu, ia ki heh sorkar; hynrei kitei ki dei tang ki jingsngew bad ki jingmutdur ki bym lah long satia.
Ka jingleh kiar bad jem mynsiem, jongngi ki trai shnong, ka la plie lad ia ki briew, kiba nabar, ba kin wan knieh lut ia ka dohkshong bad mynta, kiba sah, ki dei sa tang ki dohshyieng suda ia ngi bad kawei na ki nuksa, kaba shynna bha, ka dei ha Iewduh, ha Police Bazar, ha Keatinge Road; ha kaba ki Khasi, kim don jaka shuh, hangtei ban trei ban ktah, ban khaii pateng bad kam dei tang kata, lada peit ia ki kam kontrak, kiba heh jong ka sorkar jylla lane ka sorkar India, kiba bat, dei ki briew kiba nabar suda.
Ki khasi jongngi, ki la dei ban shim ia ka kam, ba ki la trei ki dkhar, kum ka jingdie shana, die tiar pusari, khap shniuh, suh juti, ki kam sait kam khlieng bad kiwei, ba ngin nym donkam shuh ia kiba nabar, ba kin pynbiang ia ki jing donkam jongngi.
“IOH BIANG KI KHASI IA KI JAKA DIE MADAN BA KNIEH KI DKHAR”
ka heading ba bha tam ..
Ka dustur la pynwandur lane la thaw naka rukom im u khunbynriew ym baka dustur ka thaw ia u bynriew,kaba ngi lah ruh ban pyn kylla katkum ka jingkylla bad ka jingdawa ka por,,,ban iada iaka jaitbynriew la dei ban pynkhamti biang iaka iktiar ha U Rangbah namar ka jingbamkruiñ ha kane ka dustur shynshar Kynthei daka jing shim kabu U Mynder Katba U Shynrang pat u shu ang lyngngoh haka khñium ka bynniaw.Ki Kam ki Apostol 3:25 ka kren shai ba u khun bynriew u roi na U Symbai U Kpa ym na Ka Kpoh ne U Sohpet U Ksai😇😇😇