Kumno u shipai suin, u hiar khyndew ban jurip jaka?

Ha ka sngi palei jong ka taiew, ki bor District, ki la leit ban talasi, ia kiba shong die madan ha ka surok bah Hynniewmer; hynrei, kaba i shutia pat, ka long, ba nalor ki bor District, u don sa u shipai suin bad utei u don bynta aiu sha, ban pyniaid ia ka kam jong ka District bad ia ka jaka puta,haba kiba tip, ki dei tang ki bor District bad ki bor shnong jong katei ka thain.

Kine ki bor shipai, ki la nion jem ia ki nongshong shnong ba marjan jongki, na ka por sha ka por, ha kaba ki la thoh shwa, da ki kyntien “Ban siat ia kiba rung tuh sha ka jaka jongki” bad nangta, ki la khang ia U Lum Shyllong, ba ki paidbah, kin ia rung ia mih ban leit peitkai bad nangta, ki pyntuid sa da ka umeit, sha ka shnong Mawnianglah bad kine ki dei ki kam thombor khyllah sngi jongki ia kitei kiba don marjan jongki.

Kumba ka paw, ha ka Sngi Palei, la iohi, ba ka don ka jingleit jurip jong ki bor District, na ka bynta ki nongdie madan bad ban pynshisha ia ka jinglong trai jongki, ia kitei ki jaka kiba don ha shiliang kynroh jong ki shipai bad haba ka long kumta, katei ka jaka, kam dei shuh, ka jaka jong ki shipai suin bad ka dei ka jaka jong ka shnong Hynniewmer, Mawnianglah lane kiwei pat ki shnong ba marjan bad katei ka pyni shai, ba ki shipai suin, kim don bynta eiei ruh em, ban balain, ia katei ka jaka jong ki trai khyndew, kaba don ha Hynniewmer.

Katei ka jingthmu, ka paw shai, ba ki shipai suin, ki la iwit bad ijli ia kitei kiba die madan, kiba don ha syndah jongki, katba kim shym la i wit pat ia kito kiba leit rung da ki phew bad ki spah ngut, ban leit peit ia kito ki tup ki man bad ki tiar ki tar, ba ki buh ha katei ka ktem jongki, lane ba ki kwah ba katei ka lynter jong ka kynroh, kaba ia syndah bad katei ka ktem, kan long noh, ha ka jing pyniaid jongki hi.

Ki bor District, ki la jem palat, halor kane ka bynta, da kaba ki ailad ia ki shipai suin, ba kin tuklar, ia ka jaka puta bad ka khyndew ka shyiap jong ki riew shimet bad kam dei tang kata, ka la dei ruh, ba kin tohkit noh mar mar ia ka jing ujor jong ka shnong Mawnianglah, halor katei ka jingtheh um eit bad pyntuid nala jong ki shipai sha katei ka shnong, namar ba katei ka dei ka kam jaboh tam, kaba ki leh niewbein, ia kitei ki trai shnong trai muluk.