Kumno ngin ai lut ia ka nongmei nongpa jongngi ha ki poi ei?

Ka jingkren jong U Narendra Modi, myntri rangbahduh jong ka Ri, ka dei kaba kongsan bha, ba u paidlang ka Ri Khasi Jaintia, un ia shut nep bha, ia la ka jong ka janor bad ki kyntien jongu, ki long ba lada ka Congress, kan wan biang ha ka jingsynshar ha Delhi, kumta ia ka spah jong u paidlang ka India, kan sa sam lut sha kito ki poi ei lane kiba wan rung tuh sha kane ka ri (infiltrator) bad kumjuh sha kito kiba bun khun.

Ka jingkren, ka don ar bynta bad kawei na ki bynta ka long, ia kiba bun khun bad haba kren ia ka jingbun khun, ka thew ia u khun khasi khara, uba don shibun ki khun bad lehse U Modi, u sngew pangnud, ban iohi, ba ki Khasi, ki ia ioh ia ki skhim pynroi jong ka sorkar India, ki ia ioh ban ia khaii pateng, ki ia ioh ban ia rung kam sorkar bad kumta ter ter, wat la ki dei kiba kha shibun ki khun.

Sa kawei pat ka mat, kaba kham donkam bha, ka long, ba kumno sha ba phin ai ia la ka jong ka spah ka phew, sha kine ki wan wir wan hap, ki nongwei nong ar bad haba kat u myntri rangbahduh, u kren kumtei, kumta katei ka jingkren ka thew shai ba lada dei ha Rajasthan, ka jaka ba u pynmih ia kitei ki kyntien, ka pyni, ba u maham ia kitei ki trai shnong, ba kim bit ban ailad ia kiba nabar, ba kin kurup ia ka spah ka phew bad ki jingdon jingem jongki.

Kumta, haba ka long ha katei ka dur, ka long kaba donkam eh ruh, ia u paidlang ka Ri Khasi Jaintia, ba un sngewthuh shai, ba kumno sha, un shu ai lut, ia ka spah ramew, naduh ki par mawshun, ki par maw, ki jaka kiba heh ba heh bad ki paki dulan kiba don ha ki bynta bapher jong ka Ri Khasi Jaintia, sha kitei ki poi ei, haba ka la don ka Land Transfer Act bad kata ka Sixth Scheduled Area lane ka Instrument of Accession.

Haba kat u myntri rangbahduh, ula kren ia kitei ki kyntien kiba kongsan bad kiba donkam bha, ka la dei ruh ia ngi, ba ngin ia thew ksai bha thik pa thik, namar ba kine ki jingkren, ki la dei beit sngang ha doh bad kawei na kitei ki jingkren, ka long ba um sngew iahap, ba ia ka spah ka phew jong ka India, ban ai sha kito ki briew kiba bun khun bad nalorkata, ba ngi dei ruh ban ri ban sumar, ia la ki jong ki jingdon jingem, kiba ka mei mariang, ka la ai sbun ha ngi, hynrei lada ngim sngewthuh, kumta ka spah ka phew jongngi, kin shu bam shngiam ki poiei kiba shu wan buhai shnong, tang ban ioh bam duh ia ka dud bad ka ngap jong ka ri Khasi.