Kumno ki heh sorkar, ki ioh corona?

Ka khlam ka la nang kiew jur ha kine ki sngi, ha kylleng ka India bad ka jingkhein ha ka shisngi shisngi, ka la poi sha ki lak duna bad ka jingkiew, kam dei tang ha Assam, lane ha kiwei ki bynta jong ka India, hynrei ha Meghalaya ruh, la iohi, ba ka nang kiew jur ha kine ki sngi, ha kaba ka jingkhein ka iaid sha ka shispah duna lane tam ha ka shisngi shisngi bad kiba dang don ha ka jingpang lane kita ki active case, ki poi sha ka 2 hajar ngut antad haduh mynta bad lada khein bad kiba la jem na katei ka khlam, ka pyni ba baroh ki la poi 4hajar ngut tam bad sa kiba iap, kiba long 36ngut.

Ka mat jing iakren hangne, ka long ba ka sorkar India lem bad ki sorkar Jylla, ki la pynmih ia ki kyndon kiba pyrkhing shibun eh, ha kine ki sngi, na ka bynta ban iada ia ka jingpur jong kane ka jingpang ia bit, hynrei kat kitei ki kyndon, la iohi pynban, ba ki doktor kiba tip ain bad kiba sngewthuh, ba ki ioh pang khlam ialade, ha kaba tang ha Shillong, ki la don da ki phew ngut; ki shipai kiba bud bha ia ki kyndon jong ka koit ka khiah, ki ia ioh pang da ki hajar ngut, ki pulit ruh kumjuh bad wat ki myntri ka sorkar Jylla, kynthup ia u myntri ka sorkar Meghalaya bad shibun ki MP ha Delhi, ki ioh ia ka khlam corona.

Katei ka dei ka jingkylli, kaba eh bha, namarkata ba ngin jubab bad kata ka long ba ki don kito kiba tip ain lane kiba bud ain, hynrei ki dang ioh ia ka khlam corona bad kumta, lada nalor ka jingdeng mask, ka jing ia shong jngai iwei ia iwei pat, ka jingsait kti bad kiwei kim lah ban iada ia kitei ki heh ki hain, kumta kaei pat ka lad kaba thymmai, kaba lah ban khang, na ka jing ia bit na kane ka jingpang khlam corona?

Haba shu peit ha Khasi Jaintia jongngi, ngi iohi, ba ki iing heh iing hain, ki paki dulan ki ia bit ia kane ka jingpang (lane lah ba ong ba ki dei ruh ki jaka ba ia shong bun briew) bad kitei ki jyllei bha ha ka nongbah Shillong; hynrei haba ngi peit sha ki hajar tylli ki shnong ha Ri Khasi Jaintia, katei ka jingjia, kam shym don eiei satia bad wat kito ki jaka, kiba ka la rung kane ka khlam, hynrei kim shym la ia pur satia sha kiwei pat bad katei ka dei ka jing shisha, kaba pyn lyngngoh bad pyn pyrkhat, wat la ki nong kyndong, kim shym la bud pyrkhing satia ia kita ki kyndon deng mask, ki kyndon ia jngai iwei ia iwei pat bad ka jing ia sait kti sait kjat.