Kumno ka corona, ka leit poi sha ki nongkyndong?

Ka khlam corona, ka la poi sha ki nongkyndong, ha kine ki sngi, hynrei, u don pat sa u dak jing kylli,ba kumno katei ka khlam, ka leit poi sha ki jaka kiba jngai, na kiba la don ia ka jingpang.

Kumba ngi la pule, ha ki kot khubor, ngi iohi, ba katei ka khlam, ka leit ioh, ia iwei i nong shong shnong, iba don sha jngai na ka nongbah Shillong bad kum kitei ki jingjia, ki don kiba la iap noh bad nangta, ki don sa kiba la khlain biang; hynrei, ka phang, ka long ba kumno, ba ym don iwei ruh, iba ia bit ia ka jingpang lane ki high risk, kiba ia shong ia sah lang hajuh, lane kiba sumar sukher, ha ka por, ba kim pat tip ia katei ka jingpang?

Kata ka dei kawei, hynrei, ka don sa kawei ka jing shisha bad kata ka long, ba kumno, katei ka jingpang, ka leit poi sha ka shnong, kaba jngai bah, na ka jaka, kaba ki don ki nongpang bad lada ka dei, kumba ong ki doktor, ba ka her ha ka haw haw ruh, ka don sa kawei pat ka phang ban iatai ne ban ia tih jylliew, namar ba ka jing batai jong ki doktor, ka kren shai, ba ka jingpang, ka ia bit na ka jynhaw jong uwei u briew sha uwei pat bad dei na kata ka daw, ba ka sa don ka jingbthah ban tap bha ia ka shyntur bad ka khmut.
Wat la katei ka jingpang, ka kham saphred, ha kiba bun ki jaka ha Ribhoi, hynrei, haba shu peit, ha kiwei pat ki jaka, ngi iohi, ba wat ha sor, ki don uwei, ar ngut duh, kiba ioh ia katei ka khlam, ha kawei kawei ka shnong bad kumta ka nuksa, kaba paw ha ka sngi palei, la lap ba ki don 132ngut ki high risk bad nangta sa 77ngut ki ILI, 12 ngut kiba wan phai na shabar, katba lait nangta, don iwei ha Golflink, iwei ha Umpling, iwei ha Laban, iwei ha Mawsynram bad kumta ter ter, ha ki shnong ha sor bad ha ki nongkyndong.

Ka sorkar jylla, ka la pyrkhing ia ki ain teh kyndon jongka, nangta, ka la iai bteng ia ka pakhang shnong bad nangta, ki la nang bun, kiba shah injek, hynrei, ka jingpang, kam shym aili satia bad ha ka sngi thohdieng, ka jingkhein, ba ki ai ki doktor, ka pyni, ba ka la kiew sha ka 591 ngut bad sa 18ngut kiba iap na ka khlam.

Ka jing kylli, ka don shibun, hynrei ka jubab, kam wan satia, kaba pynhun ia u paidlang ka jylla ne ka Ri; tangba ka jing shisha, ka long ba haba ka jingkhang, ka nang iai bteng, kumta uba rit, ula shah nion kput, haduh ba un da lwet syndon thiaw.