Kren tang dep, u myntri kam poh iing ia U MP

Khyndiat sngi mynshwa, U Ma Vincent Pala, ula kren niew bein shi katdei ia ki MLA jong ka seng UDP, da kaba u kynnoh ba ka jing siew bai kit dewiong, ha ka por U James Sangma, ka long T.50 hajar bad mynta ha ka por jong U Ma Lahkmen Rymbui, ka poi sha ka T.1lak shi trok.

Ym tang katta, U MP, uba dei u khlieh jong ki 36 tylli ki Constituency, u ong shuh shuh ba mynta ha ka por jong u myntri NPP, ka jingduh ding ka long kaba da ki khyndiat kynta, hynrei, lada yn aiti sa ia katei ka tnat kam ha ka seng UDP, kumta ka jingduh ding, kan poi syndon sha ka 12 kynta.

Kaba lyngngoh, ka long ba haduh kattei ka jing kynnoh jong U Ma Pala, hynrei, ynda la poi sha ka jubab, u Ma Rymbui, ka long ba u kynnoh pynban, ba ka dei tang ka jingkren politics jong U MP bad katei ka dei ka jubab, kaba da blad tasam hi khait, ha kaba kat ia ka jing kynnoh bam sap, lane ka jing kynnoh khrong pisa jubor kaba haduh T.1lak ia kawei ka trok kit dewiong, yn shu ong, ba ka dei ka nia politics, kam iahap satia.

Katba kum katei ka jingkren U Ma Pala, kaba ha khmat duh, ka long ba U Ma Rymbui, um dei ban kren ialade kum u riew madan, hynrei, u dei ban pyn donkam ia ka bor kum u myntri kam poh iing bad kata ka long ba u la dei ban thaw, ia la ka jong ka kynhun tohkit kaba kyrkieh, ban lap ia ka jing shisha, halor ka jing iapher jong ka 50hajar sha ka shi lak tyngka bad kata ka long ban pyn thikna, ba U MP, u shu kren pynjah burom ia u, ne ioh u kren pynban, ia kaba dei; hynrei, lada jia ba um sngew nud ban shimti dalade hi, ula dei ban thung da ka kynhun tohkit, lada dei lyngba ka sorkar jylla ne wat lada dei da ka sorkar India ruh.

Ban shu kynnoh, ba ka dei tang ka jingkren politics, kat ia katei ka kam tuh kaba shyrkhei bad kaba shongdor da ki spah klur, ha ka shisngi, ka long ka jingkhein sting, kaba la palat liam bad ka pyni ruh, ba u myntri kam poh iing, um sngew jah burom satia, halor kattei ka jingtuh ia ka pisa paidbah lane ha kawei pat ka kyntien, ka pyni, ba ma u pleng dalade, u tip bha, ia katei ka jingiaid ka jingsiew pisa jong ki nongkhaii dewiong bad lada ka long kumta, ka pyni shai, ba ka jingkren jong U MP, ka long kaba dei bad ba ka jing kynnoh bamsap halor ka jing khaii dewiong, ka long kaba thikna, namar ba la pynskhem syndon da U MP ka Shillong.