Kren mon, ia ki nongsiew bai ding

Ka la mih ka jing byrthen jong ka seng bhalang na Ribhoi bad katei ka dei na ka daw, ba ka nongtrei jong ka tnat MeECL, ka kren niew bein, ia ka nongthang ding ilektrik, ha ki khyndiat sngi ba ladep bad katei ka la pynlong ia katei ka seng, ba kan leit tur sha ophis jong katei ka tnat kaba don ha Umiam.

Ngin nym iakren eh, ia katei kawei ka mat, hynrei hangne, ka wan ka jing iakren, halor ka jingleh mon bad kren mon, jong ki nongtrei ophis, haba ki paidbah, ki leit sha ki jing donkam jongki.

Halor ka bai ding, shu buh, lada jia ba ha u bnai rymphang, ka bai ding, ka long T.1,000; hynrei ha u lber ka poi noh sha ka T.2,000; kumta ka dei ka hok jong u trai iing, ba un leit ujor, namar ba u briew uba shait thang ar tylli ki bulb, un nym thang kynsan 5,6 tylli ki bulb ha uwei pat u bnai bad ka pisa ha uwei pa uwei u briew, ka dei kaba da don jingkhein thikna, ha kaba wat ki nongtrei ophis, ki khein, la ki jong ki ta,da, nangta kiwei ki jingioh kiba ki don bad lada jia ba ka sorkar, ka leh shalak, kumta, ki mih sha madan ban iakhih bad haba kumta, u nongthang ding, lei u dei ban leit tied jingkhang dar dar.

Kam dei tang kata, ka don sa kawei ka mat kaba donkam bha hangne bad kata ka long, ka jing thylli ki ophis sorkar bad bunsien u nong kyndong, u mih na la shnong, na bynta ki jingleit donkam kiba rit duh ha ki ophis sorkar, hynrei, na bynta i jing donkam iba rit duh, la ju pyndik, da kaba phah wan, lai, saw sien ia kajuh ka kam bad ka jubab, ka long ba ym don u nongtrei uba peit ia katei ka kam bad kaba kum katei ka jingjia, ka dei kaba sngew jli tasam, namar ba ia ka bui jong ka tnat sorkar, um lah ban tuklar da uwei u briew uba pep trei, hynrei kiba don ha ophis, ki dei ban tip bad ban iarap ia kiba donkam.

Sa kawei kaba eh than, ka long ia ka por bam ja ki nongtrei ophis, kaba shimpor shi kynta tam bad ha katei ka por, kin khang tdam ia ka kamra lajong bad hangtei kin ia shongthait jai; hynrei kam lah long ban bamja baroh shi kamra, bad ban khang ia ka ophis, la kum ka iit shet ja lajong.

Ka la dei hi ka por, ia ka sorkar jylla, ba kan buh noh, da kawei ka tnat, ha ki ophis bad katei kan dei ka “rti cell” lane ka “grievancess cell” ha kaba yn khlieh da U Chief Secretary lane U Principal Secretary bad katei kan dei ka jaka, kaba ki nongleit donkam, kin ia rung ia mih.