Kren jot ia uba im bad sa ai burom, un da la iap

Kane ka bynta jingiakren, ka la donkam ban nang iatih shuh shuh, ha kine ki sngi, ha kaba ka social media, ka la jubor haduh katta katta, bad ba ki briew kiba bang ban ia wohnia wohdaw ia kiwei pat, ban ia kren bein bad niew bein ia kiwei, katba kim shym la peit satia ia ka lyngkdong lajong.

Haba kren ia kane mat, ka donkam ruh ia ka jinglong adkar ialade, khamtam lada phi long ki nongialam ha ka sain pyrthei, ha ka kam niam, ka kam sengbhalang bad kiwei kiwei bad kata ka mut, ba phim dei ban im lyngkar, kren lyngkar, namar ba katei ka kyrtoh hi ialade bad ba kam slem hi ruh, ba kan wan phai kylla.
Ka jingshisha, kaba paw bha ha kine ki sngi, ka long ia uno uno u briew, un da la iap, ki tuid ki jingkren sngewlem, ki bym don pyrthei shuh lada dei ha ka ktien, lada dei ha ka thoh, lada dei ha ki kotkhubor lane ha ki jingialang sngewlem ban burom khadduh ia uba iap bad la iohi, ba kito kiba kren, ki da jaw ummat shisha (hynrei kitei ki dei ki ummat kuratia suda), katba ia u juh u briew, ha ka por, ba u dang im, ki kren ia ki ktien kiba la sngew pohjait pohrati haduh tang ban pule ne ban sngap, la da kthang hi ngak.

Haba kren ia kane kam mut ruh ban ong, ba ngim dei ban kynthoh ia ki kam ki duk jong uno uno u briew, khamtam lada u dei u nongialam paidbah, hynrei katei ka dei ban long beit halor ki kam ki jongu, khlem da shim kabu ban kren ia ka jinglong shimet jong u briew, ia ka jinglong ka rta, ka dur jongu, ka kyrteng jongu, namar ba kine ki pynjah burom ia utei uba shah kren, ia ka ing ka sem jongu bad kaba kum katei, kam ju dei ruh ka akor khasi, ban ia tih tyllong ia ka jinglong jingman jong u shimet, namar ba kan kyrtoh kylla ialade.
Kiba bun na kiba ktah ia ki social media, ha kine ki sngi, ki dei ki khun samla bad kumta, ka la dei ia ki, ba kim bit ban tih tyllong eh, ia ka jinglong shimet jong u briew, namar ba katei kan pynmlien ia ki, ba kin tuklar ia ka jingim kiwei (ban klet pat ialade) bad da katei kajuh ka jingmlien, kan sa pynpoi ia ki, sha ka jing iashun ne iashut para briew, tang namar ka jingmlien ban im bad ban kren lorni ia kiwei.

Ka la dei ia kane ka juk, ba kan pyrkhat jylliew ia kane ka mat bad kata ka long, ba ka dei ban niew burom akor ia la ki para ri, ha kaba kan ai burom ia uba dei hok bad kan sneng kan kraw ia uba leh tam leh palat hangne hangtai bad haba shu peit kane ka jinglong ka la duh ha kine ki sngi ha u paid Khasi, wat la ka dang don ha Garo hills, ha ka jingniew burom ia ki nongialam bad la imat, kumba katei ka jingbang kynthah briew, ka jia bha ha kine ki nongialam kiba mynta, katba ka duna ha ki nongialam kiba mynshwa.
Naduh nangne shakhmat, ka la dei namarkata ia kito kiba kam ialade, kum ki nongialam, ba kin da husiar ia la ka kren ka khana, khamtam, haba ki kren ha ki rynsan paidbah bad ba kin kren ia la ki jong ki mat ki jongki, hynrei kim dei pat ban lapmiet, ban leit wohkjat ne pyn pohjait ia la u jong u thylliej, da kaba ki leit wohnia wohdaw ia kiwei pat, namar ba kane ka jingleh, ka plie lad ia ki riew paidbah, ba kin nang shim kabu bad ban nang pynheh ia kito ki jait jingkren kiba pynhiar kyrdan ia uba kren bad ia uba shah kren ruh.