Kren diaw mynsiem, U Mukul Sangma

U Mukul Sangma, u nongialam liang pyrshah, ha ka dorbar jylla, ula kren diaw mynsiem jur, halor ka mat, kaba pyn iapher hapdeng ki Garo, ki Khasi bad ki Jaintia bad katei ka dei imat, ka daw, kaba wan na ka jing jied nongialam thymmai jong ka seng Congress, ia U Ma Vincent Pala lane kaba thew ba ka jingthmu jong ka seng Congress, ka long ban wan rah noh da U Ma Pala, kum u kyrtong myntri rangbah ka jylla, ha ka elekshon MLA 2023.

Ka jingkren jong U Mukul Sangma, ka don ka jing shisha ha ka, namar ki Garo bad ki Khasi Jaintia, ki dei ki trai shnong jong ka jylla bad kumta, ka jinglong nong ialam ia ka sorkar, ka dei ban long ia ka parti, kaba jop bun duh ki MLA bad nangta, kaba sah, ka long sa u nongialam, uba la mynjur lang, da kata ka kynhun, kaba don bun ki MLA lane, bad to ngin kynmaw, ba U Capt WA Sangma, ha ka por ba u long myntri rangbah ha u snem 1972, um shym long dalade, hynrei, u shah jied ha ki nongialam, kiba bun, ki dei ki rangbah Khasi.

Ha kine ki phew snem dep, ba ladep, ka Congress, ka la pynkhih win ia ki shuki myntri rangbah jong U bah DD Lapang, Bah JD Rymbai bad ha katei ka jing ia knieh bor jong ki MLA, ka shu leit poi ka shuki nongialam sha U Mukul Sangma, ha u snem 2011 bad kata ruh, kam dei ba u mon dalade, hynrei, la kynmaw ba ki don bun ki MLA Khasi, kiba kynshuit ia U Mukul, ba un shimti ia katei ka lyngkor.

Na kitei ki jing shisha haneng, ka pyni shai, ba ka shuki myntri rangbah, kam shong satia, ha ka mon jong ki 24ngut, ki MLA; hynrei kaba bun hi, ka shong ha ka mon jong ki 36ngut ki MLA bad ia kata, ngin pyn thikna, na kaba la jia ha u snem 2018, namar ba wat la ka NPP, ka la tyrwa myntri rangbah ia U Bah Prestone Tynsong, hynrei U Dr Donkupar Roy (bam kwai ha dwar U Blei), u nongialam UDP, ula jied hi, ia U Conrad Sangma.

Kam dei tang katta, ki jing shisha ki kren ruh, ba ki nong ialam politiks na Garo Hills, kim ju don ki heh spah, kumba don ha Khasi, Jaintia hills bad haduh mynta, ngi tip, ba U Conrad Sangma, U Mukul Sangma, U Salseng Marak bad kiwei ki dei kiba im sngi ialade ha ka sain pyrthei bad kim ju im, ha ka kamai spah, kumba long ki heh spah politiks na Khasi Jaintia.