Kordit ki samla pule, ha ka mobile network

Ka myntri jong ka sorkar India, kaba dang shu risain kam ha ki khyndiat sngi ba ladep, ka Harsimrat Kaur Badal (haba kren shaphang ka ain nongrep, kaba dang shu pynlong ain shen), ka ring jingmut halor ka jingleh jong ka kompeni Jio, ha ki sngi ba ka dang shu sdang bad kata ka long, ba ka ai ai jio mobile ia ki paidbah, ba kin pyndonkam baroh baroh da ka sim card Jio bad mynta pat, ka sa khyrwait kylla.

Kumta ka jingiakren hangne ruh, kam mut halor ka ishu nongrep, hynrei ka dei halor ka ishu jong ka jio mobile lem bad kiwei pat ki mobile, kiba la khniot im im peit peit ia ki paidbah, kiba pyn donkam mobile ha kylleng ka Ri Khasi Jaintia bad kawei na ki jingthok, ka long ba ki ai mobile connection, wat ia uto uba don sha lawbah lawsan, ha kaba ym don wat tang u syrngiew jong u tnum mobile bad kumta kum utei u briew, u shu pynlut kai ia ka pisa ban thied mobile, nangta ban recharge ia ka sim card jongu bad shu antad, lada u pynlut tang 50 tyngka shibnai, kumta un pynlut 600 shisnem, ba kan shu bam ei ka kompeni.

Kam dei tang katta, ka mih sa ka jingeh, ha ka jing pyn khuslai jingmut ia utei u briew, ban don kiba phone, ban leit wad mobile networ bad kumta ha ka jingwad network, ki don kiba hap iaid ruma rutit da ki bun bun kynta ban poi sha ki khlaw ki btap lane sha ki shnong ba sha jngai ruh.

Ka sorkar jylla, lyngba ka tnat pule puthi, ka dang iai kren ia kata ka online class bad katei ka dei ka klass jong kiba ioh ba kot, kiba lah ban thied mobile, kaba shongdor da ki phew hajar, nangta ka dei ka klass jong ki nongsor bad kumta, katei ka dei ka klass jong ki riew leh shiliang khmat lane ka jingmut kaba dei ban shu pyndep rukom bad katei ka jingleh bym salia, kan nym ktah ia ka sorkar, kan nym ktah ia ki nonghikai, hynrei kan ktah ia ka lawei jong ki khynnah rit bad ia ka nongrim jongki ha ka pule puthi.

Ka sorkar Jylla, ka la dei ban pyndonkam ia ki kotkhubor, ki video channel, ka doordarshan bad ka all india radio, na bynta kane ka prokram jongka bad lyngba kitei ki saw tylli ki lad, lehse kan kham suk shi rukom ia ki samla pule; hynrei ka jing shaniah ia ki mobile, ka dei ka jing pyrkhat jyndong jingmut. Ka kut snem, ka la poi bad kine ki jingleh bakla, kin ktah shi katdei ia ka thymmei jong ka pule puthi ha ka jingim jong uwei pa uwei u samla pule.