Ki khun binong bishon, kiba don ha sor lane kiba don ia ki smart phone, kim tip eiei satia; hynrei lada phi leit sha ki nongkyndong, phin iohi, ba ki dur khmat jong ki duk ki rangli, kiba shong ha ki iing sop plastik, kiba shong ha ki iing tap shiliang, kiba shong ha ki iing skum, ki iing phlang, ki ia bunkam ha kine ki sngi, ban tei ia ki iing dewbilat jongki, lyngba ka jingwan jong ka skhim thaw iing baduk jong ka sorkar India bad ka burom ia kane ka leit sha U Narendra Modi, myntri rangbahduh bad ka kynhun myntri jongu baroh kawei, ba ki la leh ia ka kam, kaba bha tam, ban ai jaka rieh, ia ki riew shong madan, ia ki khlem iing khlem sem ha kylleng ka Ri India.
Katei ka skhim, ka iaid jar jar bad kam donkam satia ia ki prokram ot ribon, ki jingiathab kti, ka jing ia khawai bamja ne dihsha bad katei ka dei ka jingsbun bad ka jingieid jong ka sorkar India, ia u duk u rangli jong ka Ri Khasi Jaintia bad katei ka skhim, kam kylli satia la phi dei uba kyrshan ia ka parti jongno, hynrei, la sam beit sam ryntih, ha ka jingstad jong ka sorkar India lem bad ka jingpeit jong ki ophisar ha ki Block bad ka jingbei pisa kaba haduh T.1.30lak, kam dei shuh, ka jingiarap kaba rit, hynrei kat haduh ha kine ki sngi, ngim iohi, ba kin don kiba ai khublei ia ka sorkar jong U Narendra Modi, myntri rangbahduh ka India, lada dei ha ki kotkhubor, lane lada dei ha ki social media; hynrei, la iohi, pynban, kumba ka jingthmu, ka long ban tap eit miaw, namar ba kam dei kaba ioh ban kam trai, ha kata kaba ki ong MLA skhim.
Ha shwa ka elekshon, ka jingshong shit jong ki nongtrei parti NPP, kaba la i shyrkhei sat, ha kaba la pynlong ia ki jingialang kiba radbah sha kylleng bad ba la hap ia beh kyrkieh sha kitei ki jingialang, da kaba leit da ka helicopter bad katei ka dei, na bynta ki skhim khun syiar bad khun sniang, kiba T.5 hajar. Ym tang katta, ki paidbah, ki ia duh sngi duh ia, ban leit iakynduh ia ki MLA bad ki nongtrei parti, ban ioh ia i MLA skhim, iba shiphew lane 15 hajar; hynrei kat ia ka skhim kaba T.1.30lak, ka pyrthei, ka kynjah beit jar, namar ba ka dei ka skhim, kaba long ban tare tang ka shim, hynrei ban pynkylla sha ka ai lane sha ka vote te em, namar ba kham lah, ia kito kiba siew nokot, da ka kot 500 lane ia kiba thiang thylliej bad ki riew kob sob, ha ki jaka iew bad ha ki rynsan paidbah.
Ka sorkar India, ka la leh bha palat, ha kaba iadei bad ka skhim um, sha ki tyngkong iing jong ki briew bad nangta, sa kane ka skhim thaw iing, ia u duk u rangli bad ka la dei ban pynkhlain, ia ka jingpynbna jongka, sha ki kotkhubor, ba u paidlang ka Ri Khasi Jaintia, un tip shai, ba ka dei ka skhim Modi; hynrei tang shu la bakla, lashai ka por elekshon MDC bad MP, kin sa bun ki nongkam trai, da ka hanga bad ka manga suda.
Ka la dei ruh ban peitngor bha, ia kine ki skhim, ba ki BDO lane ki bor shnong, kim bit ban leh shutia, namar ba kiba bun na ki shakri sorkar lane ki nongkit kam shnong, ki dei ki nongbylla jong ki politician bad kum ia kine, dei ban nion, da kaba tyngeh, ba ki pynkylla politiks, ia ka skhim ba khuid bad kaba beit tam jong ka sorkar India.
NGA kwah ba u PM jong ngi un jop biang sa shisien khnang ba un rah arshah ka scheme ia ngi ki duk ki rangli tang ma u u PM ba iohi jngai ia ki duk ki rangli naduh ka ing ka gas ka light ka painkhana u khaw bad kiwei.