Kiba ioh MLA skhim, kin hap kyrshan biang?

Haba la jan ka elekshon, la iohi, ba ki MLA, ki la ther bor bah, ban pynieid lane pynbieit ia ki paidbah nongjied ha ki rukom bapher bapher.

Don na kito kiba leit plie ia ki surok, kiba leit sha ki iing iap briew, ki iing iathoh bad kiba sei lut, ia la ki jong ki skhim bapher bad nangta, kiba sei paidbah, ia la ki jong ki MLA Skhim, da kaba sam sha ki nongjied jongki; da kaba siew T.10hajar lane T.15 hajar, kum ka jingai bainong, ha ka jing pynkhreh elekshon 23.

Hynrei ka jingkylli, kaba mih hangne, ka long la kano kano ka jingai sngewbha na ka liang ki MLA, ka dei kaba ki sei na la pla, lane ha kajuh ka por, ka dei ne em, na ka bynta ban pynmyntoi ia u luk u lak, lane ioh ka long pynban, tang ka jingai baishun bad shu bret kai ia ka pisa khlem myntoi eiei.
Ka la dei ban don ka kynhun, kaba tih bniah, la ka la don ne em, kano kano ka longiing, kaba la myntoi shisha, na ka jingai ia kitei ki MLA skhim, lane lehse, ioh ka dei pynban, tang ka kam pynlut phut ia ka pisa sorkar, ha kaba ym don jingiohnong eiei ruh em, lane tang ka jingduh ei pynban ia katei ka pisa, kaba la ai nokot ha kti jong kiba shah jied bad ka bym iahap dor eiei ruh em, ha kiba kum kine ki sngi kiba kordit shibun, ia ka kamai kajih.

Kam dei tang kata, ka MLA skhim, ka dei ka pisa kaba rit bad ka sorkar jylla, ka la dei ban pynduh jait noh ia baroh ki skhim bad pynkylla noh sha ka MLA skhim, lane ban pynduh noh ia ka MLA skhim, ban pynrung sha kiwei pat ki skhim kiba donkam bad kata ka long, namar ba ka MLA skhim ia shisnem, ka don ka pisa kaba T.2.5klur bad lada khein, ia ka jingai kaba T.10hajar shi khlieh briew, kumta kiba ioh kin long tang 2,500ngut shisnem lane kaba long 10,000ngut ha ka 4 snem bad katei kam iahap eiei ruh em, ha ka Constituency, kaba ki don 30, 40 hajar ngut ki nongthep vote.

Kam dei tang kata, hynrei, ka ju long ruh ka rukom, ba uba ioh MLA skhim shisien, kata ka mut, un ioh shisien shirta, namar ba un nym nud satia ban iai dawa man ka san snem, ba kan sa paw, ba un long uba khwan lalot tang ialade bad kumta ka jingai jingmut, kaba beit bad kaba koit bha ia ka synshar paidbah, ka long ba uba la ioh MLA skhim, u dei uba la shah beh bad un hap ban wad lynti thymmai noh shawei pat.