Ki skul bad ki iingmane ki la plie

Sngew tynnad ba ki skul bad ki iingmane, ki la sdang plie noh, ha kine ki sngi bad kitei ar tylli, ki don ka bynta kaba kongsan bha ha ka imlang sahlang jong u briew bad lyngba ka jingplie lad ka sorkar jylla, la khmih lynti, ba ka pule puthi, kan bteng biang noh, kumba ju long mynta u snem bad nangta ba ki rukom shakri Blei, ruh, kin iaid noh, kumba ki ju long ha ki snem ba ladep, khlem da don shuh ki jingteh kyndon.

Ka khlam corona, ka la pyntieng koh tympan ia ka pyrthei baroh kawei bad kumjuh ia u paidlang ka Ri Khasi Jaintia; hynrei, haba peit bniah ia ki jingjia, la iohi, ba kumba kane ka corona, ka kham dakaid bha ia ki heh ki hain, ia ki iing paki dulan bad ia ki nongsor ruh kumjuh.

Ngim tip ia kaei ka daw, hynrei ka jingshisha, ka long, ba ki nongkyndong, kim lah bad kim treh hi ruh ban bud ia kito ki kyndon ain deng mask, ki kyndon ain ban ia shong jngai, ban ia sait kti sait kjat, ban ia thew jingshit jingkhriat; katba kitei ki eh mlun mlun bad kim ia pang corona satia; hynrei kine pat kiba deng mask, lane ki riew tip ain, ki shu ia ioh pang iabit iwei sha iwei pat bad ka Shillong, la iohi, ba ka la dei ka ktem bah jong ka khlam corona.

Kam dei tang kata, halor kane ka jingpang, ym don doktor lane ym don sorkar lane ym don paidbah, kiba nud ban kam trai ba ki la lah ban sumar ialade, lane sumar ia kiwei, namar, ba ym don dawai satia bad la iohi, ba ka jing ai injek, ka dang iaid, dang katto katne sngi; hynrei, kito kiba ioh ki shu shong thait bad shong kynjah ialade bad tang hadien katto katne sngi, ki la lait na katei ka khlam corona, lada ki dei ban koit, hynrei, lada ki dei ban iap, kito kiba poi sha ki hospital ruh, kim lait satia na ka jingiap bad ka jylla, ka la mad mynta ia 146 ngut kiba iap na katei ka khlam.

Hap ban pynkut nia, na kata ka daw, ba ka jingpang corona, hi, ka dei ka jingpang kaba maian blei bad ka bym lah satia ban batai, ha ki kyntien jong u briew; ha kaba ka shu wan tap kyndit ia u khun bynriew, ha ka pyrthei shi tyllup bad ynda, ka la mon ban jah ruh, ka shu jah la ka jah bad katei ka paw shai, ba haba ka jingpang, ka la jah ha Meghalaya bad kam don shuh satia wat ha India, ha kaba ki jylla, kiba la trei bor bah, da ka corona, kum ka Maharashtra, Delhi bad kiwei ruh, ki la stang hi iar.