Ki seng pynmih politician, ki la bun, ki seng pynmih ophisar pat?

Ka Meghalaya, ka la jan dap 50 snem ka rta bad ha kine ki snem, ngi la pynmih ia shibun ki riew sain pyrthei, kiba la kiew ka nam ka burom, ka spah ka phew bad kumta ter ter; hynrei lada ngi iakren ia ka jinglong jingman jong ka jait bynriew, ngi iohi, kumba ka shu tyllun sah, ha u juh u peiba (axis), wat la ha ki khep ki khep, lei ngi iohi, ba ngi la sdang hap sha trai.

Ka mat, kaba ngin iakren hangne, ka dei halor ka jingmih bun ki riew sain pyrthei, ha kaba ha kine ki sngi, ki don ar jait, ki kynhun kiba poi sha kane ka lain bad (i) ki nongtrei sengbhalang bad (ii) ki heh spah.

Ngim lah len, ba ki ar tylli ki sengbhalang, ba paw ha ka Ri Khasi Jaintia, ba ki la pynmih ia shibun ki riew sain pyrthei bad kitei ki kynthup ia ka KSU bad ka FKJGP, hynrei ngim tip, la kitei ki dkhot barim jong kitei ki seng, ki ju kynmaw ne em, ban pyn urlong ia ki mat jing dawa jong kitei ki seng, ba ki la ju dawa dalade hi, ha shwa ba kin rung sha ka sain hima sima bad kitei ki kynthup lehse ia u pud u sam, ia ka jingwan tuid ki bar jylla, ia ki ain iada ia ka jaitbynriew bad kiwei kiwei.

Hynrei hangne, ka don sa kawei pat ka mat bad kata, ka long ba ka jaitbynriew Khasi, ka duna palat ia ki ophisar heh, kiba dei ha ka kyrdan jong ki IAS, IPS bad kiwei kiwei bad lada kitei ki sengbhalang ki la lah ban pynmih ia shibun ki riew sain pyrthei, kumta ka la dei ba kin sdang noh, sa kawei ka lynti bad kata ka long ba kin pynmih noh ia ki ophisar, ki ban shimti ia ka lyngkor ban long ki Deputy Commi ssioner, ki Secretary bad ki Chief Secretary ha ka sorkar Jylla.
Haduh mynta, ngi iohi, ia ka jinghiar jong ka jait bynriew, ha katei ka liang, ha kaba ki dkhar, ki la leit poi sha ki Block, ki Civil Sub Division ban shimti ia ki kam synshar ha kitei ki nongbah jong ki Civil Sub Division, namar ba kim don ki briew jongngi, kiba bit ban shimti ia kitei ki kam.

Ka la dei ka por ia ki seng bhalang, ba kin sngewthuh, ba ka lyngkor jong ka kam shakri paidbah, kam dei satia tang ha ka jingdon ki MLA, ki MDC, ki MP; hynrei, ngi donkam ia ki ophisar, kiba tbit, kiba kiba nud bad kiba ka India ka ithuh bad lada ngi don ia kiba kum kitei, kumta ki jingeh jong ka jait bynriew, kan kham suk, ban ia shut jabieng bad ka Delhi.