Ki Sangma pyrshah ia U Ma Pala ha ka Congress?

Mar ia shimti U Ma Vincent Pala, kum u nongialam ba thymmai jong ka Meghalaya Pradesh Congress Committee (MPCC), la sdang iohsngew, ba kan don ka jing ia tan tyllai, na bynta ka kam nongialam jong katei ka seng ha ka jylla, hapdeng U Mukul Sangma pyrshah ia U Ma Vincent Pala bad katei ha ka jingshisha, kam dei shuh ka mat kaba buhrieh, namar ba ka AICC, ka la dep rai sha ka liang U Ma Pala.

Haba shu peit, la iohi ruh, kumba ka don khyndiat, ka jing kyrmen, namar ba mar ia shimti U Ma Pala, ula wan phai U bah RG Lyngdoh, uba la shah beh seng mynshwa ha ka Congress bad nangta la sngewthuh ba un wan phai sa U bah PN Syiem bad kitei ki nongialam, ki dei kiba la don daw suda bad U Mukul Sangma.

Ym tang katta, la ju ioh sngew hi ruh, ba ka sur jong u paidlang ka Ri Khasi Jaintia, kam pat klet satia ia ki kam thurmur jong U Mukul Sangma bad khlem pep, lada ka Congress, ka dang ailad ia U Sangma, kumta, ka lynti iaid jong katei ka seng, kam pat thikna satia ha ka elekshon 2023.
Hynrei hangne, ka wan pat sa kawei ka mat bad kata ka long, la ka Congress, kan jied myntri rangbah iano pat, lait noh na U Mukul Sangma bad la kan jied ia U Ma Vincent Pala, uba dei uwei na ki nongkhaii heh spah, ne kan jied ia U Bah RG Lyngdoh, uba ki la leit wad shitom khnang, ne kan jied iano pat?

Haduh mynta, ka jylla jongngi, ka ioh shibun ki MLA, ki myntri sorkar, da ki heh spah suda; hynrei ngim pat ju ioh, ia ki myntri rangbah, kiba dei ki heh spah lada dei U Mukul Sangma, lane U Conrad Sangma bad halor kane ka mat, ka seng Congress, ka la dei ban da khan bha ialade, ba ngin lait na ki heh spah, ba kin ialam ia ka sorkar, ba kan nym iai jia, ka jing pynduh pynum ia ka spah jong u paidlang ka jylla bad ba ngin don ia ki nong ialam, ki ban ia said ia ka hok jong ka jait bynriew sha ka sorkar India.

Namar ba ka lyer elekshon, ka la nang beh stet shibun ha kine ki sngi, kumta kan jin da la bha, lada ki seng sain pyrthei, ba kynthup ia ka NPP, ka Congress, ka UDP lane ka BJP ruh, ba kin sdang pynmih pyrthei noh ia u kyrtong myntri rangbah jongki, ba ngin ia peit khai, la ki don da ki heh jabieng lane ki heh spah, lane ki don da ki nongthaw ain ne ki nongthaw pisa.