Ki pulit ha ki khappud jong ka jylla

Katba ka Meghalaya, ka dang don ha ka jing ia pynbeit pud bad ka Assam, ka wan bha ruh ka jing iakren, halor ka shongsuk shong shngain jong ki shnong, kiba don ha ki khappud jong ki ar jylla.

Katei ka mat jing iakren, ka dei na ki kam thombor jong ka Assam, kiba dang iai bteng ha kine ki sngi, ha kiba bun ki jaka khappud bad kane ka long ka jingjia, kaba pynpyrkhat bad kaba sngew phylla ruh kumjuh.

Khyndiat taiew mynshwa, la leit sieh mawpud shwa ha Umshru, kaba hap ha Hima Jirang bad katei ka la pynbitar ia ki seng bhalang, ha kaba ki la leit ban jynrat ia kitei ki mawpud jong ka Assam bad khyndiat sngi mynshwa, la pynkulmar shnong sa ha Jatalong, kawei na ki jaka khappud ha Ribhoi District.

Kine kiei kiei ki pyn pyrkhat, ia ka jingmut kaba don ha lyndet jong ka Assam bad kane ka pyni ruh pynban, kumba ka Assam, ka don ia ka jingmut kaba sha lyndet jongka, ban pyntieng kohtympan, ia kiba shong khappud, ha kaba kum kane ka por jong ka jing iakren iasuk bad ka Meghalaya.
Haba shu peit na kiei kiba la jia, ka iohi shai ruh, ba ka sorkar jylla, ka sngap man man bad kam shym la ia pyni bor satia, hynrei ki leit mih pynban da ki riew paidbah lane ki sengbhalang, ban pynjem toin ia ki kam thombor jong ka jylla Assam lane ki briew kiba hap ha ka hukum jongka.

Ha kaba kum kane ka por, ka la donkam ia ka sorkar jylla, ba kan buh ia ki pulit kiba khlain ha ki khappud, ban buh ia ki ophisar kiba shlur bad kiba tip ain bad wat ban aiti ia kitei ki jaka khappud, ha ka jingpeit pyrman jong ki myntri shynrang jingmut bad kitei ki dei ban don ka jing iatrei lang shrup bad ki bor shnong, kiba sah sha khappud, na ka bynta ban teh lakam ia ka suk ka sain.
Kumba la kren shai, da ki arngut ki myntri rangbah, ba ka soskular jongki, lane ka MOU, ka dei tang ka dak jong ka jing iakren iasuk, hynrei, ba ka rai ban pynbeit pud, ka dei ha ka bor jong ka Parliament; kumta, ka la dei ia ki arliang mamla, ba kin tyngkan bha ialade, da kaba teh ia ki kyndon kiba eh, ia la ki jong ki pulit, ba kim bit ban leh tam, ha kitei ki jaka khappud; hynrei, lada katei ka kam iaid, ka la dei pat ia ka Meghalaya, ba kan pynshong, da ki pulit jongka, ha shi lynter jong ki khappud bad ka Assam.