Ki poiwir ha la ka ri

Ka jing iasoi soskular hapdeng ka sorkar Meghalaya bad ka Assam, ka la dep bad kaba sah, ka long sa tang, ba kan mynjur ka Parliament bad ha shwa jong katei ka por, ka la dei ia ki sengbhalang, ki nongshong khappud bad kiwei kiba sngewkhia, ba kin shim ia ka lad ba khadduh, ban pynpaw sha ka sorkar India, lane sha ki dkhot jong ka Parliament, halor katei ka kam pynbeit pud.

Hynrei katei ruh kam long shuh kaba shngain, namar ba ki ar jylla, ki la dep ia mynjur lut nadong shadong bad ha kaba kum kane ka khep, ka shu donkam, ba ngin kynmaw, ba ka Ri Khasi kham mynshwa, ka jngai bak shaduh Sylhet; hynrei ha ka jing iaphiah ka India bad ka Pakistan, kitei kiba pli, ki shah pynrung jubor sha East Pakistan, lane kaba ngi tip kum ka Bangladesh.

Ha u snem 1971, haba ka Bang ladesh, ka ioh ia ka jinglaitluid, hynrei, kam don kano kano ka jing iakren, ban kynriah biang ia ki Khasi sha ka ri lajong.
Mynta ki don ki nongshong shnong khappud, kiba hap (lehse) ha u pud uba 18 Kilometre sawdong bad kitei ki pyneh ban leit sha Assam bad haba ka long kumta, ka sorkar Meghalaya, ka la dei ban shna noh ia ka lynti kaba kham beit bad kata ka long, ba kumba ka la ai ia ki jaka puta, ki iing ki sem sha Assam; ka la dei ban shu shim noh tang ki khlieh briew bad ban pynshong pynsah, ha ki jaka kiba ha Meghalaya bad katei kan dei ruh kawei na ki lad ban pynneh ia ka jinglong kyrpang jong kine ki jaitbynriew rit paid (lada dei ki Khasi ne ki Garo) ba kin nym duh noh ia ka jinglong riewlum bad shibun ki hok jongki, da kaba kin kylla khar Assam.

Katba ka jia, kane ka jing pynbeit pud, ka paw shai tyngkrein, ba ka dei shisha halor ka nongrim jong ka shim bad ka ai lane kaba mangi ha Ri Khasi, ngi kam, ba ka dei kaba nang ai shuh shuh sha ka Assam bad kumta kane ka jing kam pud, kam don khana samari eiei, ha kaba wat tang ia ki jaka, kiba ngi don tang ha u snem 1972 (lane 50 snem mynshwa), hynrei mynta, ngi la duh la bun bha bad khlem iakren ia ka jingshisha jong u snem 1951, ha ka por ba ngi ioh ia ka District Council bad khlem ia kren eiei satia, ia ka snem 1947, kaba don ha ka por ba ki jaka puta, ki don ha ka jingpyniaid jong ki Syiem Khasi bad ka dei hangne kein, ba ka kyntien, ka ong, ba ngin sa long mraw ha la ka Ri, lane ba ngin sa kylla long, tang ki nongthoh dieng jongno re.