Ki poiei suda, kiba tuklar kam pud na Assam

Ka Assam, ka don ha ka jing ia kajia pud bad baroh ki jylla jong ka thain shatei lam mihngi bad ha kine ki sngi, ka don ka jing iakhun kaba khor bha pyrshah ia ka Mizoram, halor katei kajuh ka mat.

Hynrei kaba pyn pyrkhat, hangne, ka long ba balei ka jing ia kajia kam pud kam ju don hapdeng ki Khasi bad ki Assamese, hynrei ka mih pynban hapdeng ki Khasi bad ki Nepali, kumba la jia ha Langpih bad nangta; balei shuh ba ki leit mih sa ki khar Bangla, kiba ia kajia pud bad ki Mizo ha Kolasib bad ha Cachar District.

Ka Assam, ka dei ka jylla rilum lane kaba ngi la tip ba ka hap ha ka thup ki North Eastern State bad tang ka kyrteng, ka la shai kdar, ba ka jylla, ka dei ka jong ki Khasi, ki Jaintia, ki Mizo, ki Naga, ki Manipuri bad kumta ter ter; hynrei kaba sngew pohjait hi khait, ka long ha ka jylla jong ka shatei lam mihngi, hap ban ia knieh pud bad u khar Bengali bad u khar Nepalee bad kitei ki jing shisha, ki pyni shai pleng na ka khana samari jong ka NRC, kaba kdew ba ki don da ki bun phew lak ngut ki poiwir, kiba dei ban beh shnong na Assam.

Ka Assam pat, ha ka jaka, ba kan beh shnong ia kitei ki poiwir, la imat, kumba ka ri ka kdup bad ka kyntur ia ki sha u pud u sam jong ki jylla ba markhap bad lada ka long kumta, ka dei ka jingjia kaba sngewsih shi katdei.

Kumba la kren shakhmat, ka Assam, ka dei ban kynmaw ba ki jylla shatei lam mihngi, kim shym la iasnoh satia bad ka Assam, ha u snem 1947 lane ha shwa jong kata ruh bad hadien kata ruh, hynrei ki iasoh bad ka Ri India bad haba ki Naga, ki dawa ia la ki jong ki jaka puta, kiba hap ha Manipur bad ha Assam, ka sorkar India, kam shym la kyntait mardor, hynrei ka iaid da ki lynti bapher, ban wan rah ia ka jing ia sngewthuh jingmut bad katei ka pyni, ba ka mat jong ki Naga, ka dei ka sorkar India, ka pdiang bad ka sngew dei ban iakren bad kam dei ba kyntait ne ba kan shu nion da ka bor, kumba leh ki pulit Assam sha khappud jong ka Meghalaya bad sha Mizoram.

Kumta ka jingshisha, ka kdew ba ka nongrim jong ki Naga, kaba naduh ka por, ka jing ioh laitluid ka India; ka dang ieng haduh ha kine ki sngi bad kumta ruh, ka sorkar India, kam lah ban kyntait ia ka nongrim jong ki Mizo, ki Khasi, ki Manipuri bad kiwei ki jaitbynriew, kiba la iasoh shipor bad ka Assam, ha ka jinglaitluid ka India.