Ki odd bad even number

Ki kali kamai ha Shillong, ki dang iaid ha kine ki sngi, da kaba ia bujli number, lane da kata kaba ki ong odd and even number.

Katei ka jing pynbeit, ka dang trei kam haduh ha kine ki sngi, tang ha ka nongbah Shillong, hynrei, ha kiwei ki bynta jong ka jylla, ka la kut la kumba shibnai tam eiei.

Ka don pat ka jing lyngngoh kaba khraw ha kine ki sngi, ba haba ka trei kam, katei ka kyndon odd and even number, kumno pat ba ki surok jong ka nongbah Shillong, ba ki khapngiah tasam, haba ki kali kiba iaid ki long tang mar shiteng na kaba ju long; hynrei haba ia peit bha ia ki kali kiba iaid, la iohi, ba kiba shah teh bha ha kitei ki kyndon, ki dei pynban tang ki kali kamai, lada dei ki bos, ki sumo, ki taksi bad kiwei kiwei; katba lada phi peit ia ki kali jong ki riew shimet, phi iohi, ba baroh kiba mih ha surok, ki dei kiba don pass suda.

Kumta lada baroh ki kali praibed ki don pass suda, ka jingmut jong ka odd bad even, ka la duh noh bad katei ka pynpaw, ba ka don ka jingleh shiliang khmat, ha kaba ia u briew uba iaid donkam ialade, la hap ban ailad, katba ia ki kali kiba shakri ia ka leit ka wan kiba bun, la khanglad pynban.
Ki la mih ki jing ujor kiba bun bad ki ka jing ia khie bitar hapdeng ki nongniah bad ki nong shong kali, halor ka dor bad kata ka long ba ka bai kali ka la kiew dor palat bad nangta ba kiba shong ruh (kat kum ki kyndon), ki dei ban long tang kumba 2,3 ngut ha kawei ka taksi.

Ka la dei namarkata ia ka Deputy Commissioner, jong ka East Khasi Hills District, ba kan pynbeit bha ia ki kyndon jong ka odd bad ka even number bad ba kan teh pyrkhing khamtam ha kine ki sngi pynkhreh khristmas bad snem thymmai, ba kan nym long shiliang khmat iano iano ruh.

Nangta la iohi, ba ki bor pulit lane ki bor jong ka transport department, kim shym la teh kyndon eiei ruh em, ha ka shong khapngiah jong ki briew ha ki bos bad ki taksi bad kumta ha ka kyrteng jong ka khlam, la iohi, ba ki nang kamai heh ki draibar sumo, draibar bos, da kaba ki pyn ia shong thyngngian ia ki nongleit nongwan.

Ka ain, haba la kwah ban pyntreikam, ka dei ban iaid lang ia baroh bad lada jia ba ym lah ban pyniaid ryngkat, la dei ban sangeh noh bad ban ailad iaid kum ha ki por suk pyrthei bad ban kham duna ka jingsiew bai kali bad ban kham bun ki kali kiba iaknieh kamai, ha kylleng ki jaka sor.