Ki nongtrei bad ki trai ka EMRI

Ki nongtrei ka 108, ki la kren jew mynsiem, haba ka tnat jong ka koit ka khiah, ka la nang pynjlan ia ka jing pyniaid ia ki Ambulance bad ka kompeni GVK Emri.

Kane ka dei ka skhim jong ka sorkar India bad ka dei ka skhim, kaba la slem ha ka jylla bad kitei ki kali, kim shym don ruh tang ha kane ka jylla, hynrei, ki don ha Assam bad sha kiwei de ki jylla bad kitei ruh, ki dei kiba pyniaid hi da katei ka kompeni lane lehse da ki kompeni jong ki riew shimet, hynrei ka sorkar kam don bynta eiei.

Ki nongtrei jong ka EMRI, ki la ia khih da ki snem, halor katei kajuh ka ishu, ka bym larkam satia bad ki la shu pyndik kai ia ki nongpang, kiba pyndonkam ia kitei ki kali sorkar bad kam dei tang katta, la iohi ruh, ba mynta, lah da ki bun bnai, ki la sdang ban teh lama iong biang ha kitei ki kali paidbah lane ki kali sorkar bad ka long ka bym itynnad satia, ban shu pyndeng lama iong shirta jingim, ia kitei ki tiar sorkar bad ki bym don daw eiei bad ki nongtrei.

Ki nongtrei, lada ki sngew iahap, ki la dei ban deng lama iong ialade, ki la dei ban pynieng lama iong ha ka jaka trei kam jongki; tangba kim dei ban teh lama iong, ha ka kali jong ki nongpang.

Ka jingkwah jongki, ka long ba ka sorkar jylla, kan pyniaid hi noh dalade ia katei ka kompeni bad katei, ka long ka bym lah long satia, namar ba katei ka dei ka skhim, kaba iaid ha kine ki sngi, tangba ngim tip pat, la kan dang bteng ne em ha ki sngi, ki ban sa wan bad nangta, kam dei ruh kaba suk ia ka tnat jong ka koit ka khiah, ban buh kali da ki spah tylli, haba tang ki kali ha ki PHC ruh ki bun kiba shu khongreng suda bad nangta kam dei ruh kaba suk, ban pynrung kam sorkar, ia ki spah ngut ki nongtrei jong katei ka kompeni, khlem da bud ia ki kyndon jong ka ain thungkam ka sorkar jylla.
Ka la dei ka por ruh ia ka kompeni GVK Emri, ba kan pyrkhat thymmai ia ka rukom treikam jongka bad kawei na kita, ka long ba kan ia beit bad la ki jong ki nongtrei bad nangta, ba kan pynbiang ia ka jing shakri jongka, lyngba kitei ki ambulance ha ka jylla hi baroh kawei bad kam dei ban shu kynwiaw tang ha tyngkhap ka Secreteriat bad ka donkam kyrkieh, ba kan pynbiang ia la ki jong ki kam jongka, namar lada ka leh mattah, kin sa mih ki ambulance jong ki riew shimet, ki ban knieh noh ia ka kamai jongka.