Ki nongmihkhmat ha iing dorbar

Ha kine ki sngi, ka dang iaid ka jing ia shong dorbar jylla bad ka pyn sammut ban iohi, ia bun kiba ia rkhie bad bun kiba ia sngap bad sa shibun kiba ang lyngngoh; hynrei khlem pep, ka iing dorbar, ha kine ki sngi, ka la sdang ban khie im, da ka jingdon ki dkhot kiba triem, na ka liang pyrshah bad u paidlang ka jylla, u dei ban thab kti, ia ki MLA jong ka seng Congress, ba ki shim bynta shit rhem, ha kane ka jing ia shong dorbar bad ki sangah khlem salia ia ki Sangma shi para lem bad kiwei de ki myntri jylla.

Sngewkmen ruh, ba ka dorbar jylla, ka pyllait paidbah, ia ka jing iakren ha ka youtube channel bad katei ka ailad, ia ki nongjied ba kin bishar, ia kaei kaba ki nong mihkhmat jongki, ki leh hapoh ka iing dorbar jylla bad la iohi, ba don ki nongmihkhmat, kiba ioh jing iaroh, don kiba shah bein bad kumta ter ter bad ka dei lyngba kitei ki jing shisha ruh, ba ka mih ka jing kylli, la u paidlang ka jylla, u jied ia kiba kumno ki dkhot, ba kin leit sha ka dorbar bad la ka jingleit dorbar, ka long ban shu shong, ban shu peit sawdong jong ka iing dorbar ne ban ia kren lang?

Lyngba ka youtube channel, la iohi ruh ha ki jing ia kynthoh, ba kiba shah nion bad shah kynthah, kim dei tang kitei ki mawlun, kiba don ha iing dorbar; hynrei wat ki nongjied ruh, ki shah bein shah khoh, ba ki leit jied da kitei ki mawlun, ki bym juh ang satia, ia la ka shyntur hapoh ka iing.
Kawei pa kawei ka Consti tuency, ka don la ki jong ki jong ki jingeh bad ka jingjied ia ki dkhot sha iing dorbar, ka dei namarkata ba kin ia said bad iakren ha dorbar, halor ka jingeh jong u paidlang ka Constituency bad ka kam jied MLA, ha ka jing shisha, kam dei ban shu sam MLA skhim, lane ban leit rah ia ki surok, ka umbam umdih; namar ba kitei ki dei ki kam jong ka sorkar bad kam dei ban leit rah da ki MLA, hynrei, ki dei ban ther ha iing dorbar, lada ka Constituency jongki, kam don kam pynroi.

U paidbah, ula dei ban nang stad, ha kane ka juk electronics ba thymmai bad ha ka jaka, ba un am tang ia ka pisa, ula dei ban am ruh ia ki jingshai kiba donkam, na ki nong mihkhmat kiba ula dep jied bad ula dei ban pan ia ki mat, ba kitei ki nong mihkhmat, ki la dep iakren ha ki san snem ba ladep, ha iing dorbar bad halor kitei ki kam jongu, ba kin pyn shisha, la u dei ban shah jied biang sa san snem.