Ki nongdie madan ha Motphran

Ki nongdie madan, ha ki khyndiat sngi ba ladep, ki la poi sha Motphran bad Khyndailad bad kiba pli, ki sngewthuh ia ka jing tyrha jong ka kpoh bad ka jingtyrha jong ka kpoh jong ki khun jongki.

Ka jing shisha, ka long, ba haba pep trei ki nongtrei ophis, ka jingioh ka nang bun bad kata ka long (i) ym donkam khie step (ii) ym donkam song tiffin (iii) ym donkam leit trei (iv) ym lut bai kali; hynrei, haba pep ki nongdie madan, kumta baroh ki tnat, kiba mih, na katei ka dieng bah, ki sdang jlop lut khait.
Ki nongdie madan, ki tip bha, bad ki sngewthuh bha, ia ka jingma jong ka corona kaba her ha ka jynhaw para briew, hynrei ki sngewthuh pat, ba ka corona, kaba dei ka kpoh jongki, kam aili, lada kim ioh ban ai ja miet ja step.

Ngim tip, haei ka don ka lait ka let, hynrei, ka sorkar jylla, ka la dei ban iaid sha ki bor shnong bad sha ki jaka, ba ki don kitei ki nong die madan bad ka la dei ruh ban pyni, ia la ka jong ka bor bad kam dei ban shu leh stereo type, da kaba shu kam trai ia u juh u khaw 5 kilo, ba la pynbna da ka sorkar India.
Ngi la khmih lynti, ba lada na Delhi, u wan u khaw 5 kilo, hynrei, ynda poi ha Shillong, la dei ban pynmih sa shi kilo, u dai, u phan, lane kiwei pat ki marbam, ban kham pynsuk ia u luk u lak.

Ki nongdie madan, ki la kren shai, ba lada phim shah ban shong madan, ai noh da ka bam bad khlem pep, lada ka sorkar Jylla, ka iaid sha ki shnong, ba kin wad ia kitei ki nongdie madan, kumta, kan nym jin da la pyn bunkam satia ia ki pulit ban pahara ha Motphran, lane ia ki nongshong madan ban ia lum lang ha ki jaka iew.
Kumba la ong haneng, la iohi, ba ka tnat mar bam jong ka sorkar jylla, kam pat shym la pyni eiei ruh em, ia ka bynta jongka, ha une u snem bad ka la dei ba kan sei ia la ka jong ka bor (katba ka lah), ban sam ia ka bam ka dih bad ha kaba kum kane ka por, kam dei ruh ban ai bam tang ia kiba don kot reshon, hynrei, dei ban sam salonsar, ia u duk, u riew spah, ia u trai shnong, lane u mynder bad katei ka dei ka bynta kaba ha khmat duh, lada jia ba ka sorkar, ka sngew beit jingmut.

U myntri rangbahduh, ula ong, ba kane ka dei ka khlam kaba sniew tam jong kane ka spah snem, hynrei kam iahap ban shu kren, tang ka da ktien, hynrei ka jing iarap, ka dei ban long kaba bha tam, ia u khun bynriew, uba don ha kane ka juk jong ka jing kyrduh kaba khraw.