Ki nongbylla bad ki bank account jongki

U Bah Prestone Tynsong, symbud myntri rangbah ka Jylla, ula iathuh, ba ki nong bylla, ki bym ioh ia ki jingiarap, na ka sorkar jylla, ha u snem jong ka pakhang shnong 2020, ki dei ki bym don bank account lane kiba ai bakla ki bank account, lane ba ki bank account jongki, kim trei kam satia.
Katei ka jingkren, ka don ka nia hangta, hynrei ka tnat labour lane ka sorkar jylla, ka la shu shaniah palat ha ka juk computer, wat la ka da sngewthuh shai, ba u paidlang ka jylla, u dang don bun bah, u bym tip satia kaei kata ka computer.

Mynta, ka sorkar India, ka pynbor ia ki paidbah, ban plie account ha bank, ynda ki la dep plie, lada kim don pisa T.1,000 ha Bank, kin shah ot man u bnai ha ka Bank bad kumta, lada ka sorkar Jylla, ka siew T.2,100 (kumba la iakren), ka pisa, ka ban leit sha kti uba dei hok, kan long T.1,000, hynrei shi hajar, kan hap shong hapoh Bank.
Nangta ban leit sei ia katei ka T.1,000, ka donkam sa ka bai kali kaba rem (khamtam ha kine ki sngi) bad lada ka bai kali, ka shongdor T.500, kumta ka pisa, ka la shu lut haba iaid ia ki nong bylla.

Kam dei tang katta, lada leit sha Bank, kam dei ka jingiaid kaba suk bad la iohi, ba katno ki paidbah, ki shem sohsat, ban leit ap, ia katei ka T.1,000, ha kaba ki hap ban ap lain, da ki bun kynta bad nangta, ka internet kam trei kam bad la hap wan bunsien, na bynta katei ka pisa, kaba shi saphit.
Ka sorkar, ka don ia ki nongtrei jongka sha ki Block, ki Sub Division bad nangta ka don ruh ia ki post ophis, kiba poi sha ki shnong ki thaw bad ka la dei ban aiti ia katei ka jingsam pisa, sha kitei ki nongtrei kiba don ha madan, kumba ka health department, ka shaniah ia ki ASHA bad kiwei, hynrei la iohi, ba ka tieng ban ai ia ka pisa sha ki paidbah, katba kam bynnud, lada ki khyrwait ki Bank, katba mon ia u nongkyndong baduk lane kaba long beit, ba ka pisa jong u paidbah, kin nang bam hun shwa ki Bank.

Ngim tip, la u paidlang ka jylla, u don katno percent, uba don Bank account, namar ba wat ki Bank ruh, ki don mynta tang ha ki nongbah suda bad ka jingmut jongki, ka long ban pynbiang tang ia ki heh spah kiba bun pisa bad kumta, lada ia baroh ki jing donkam jong u paidlang ka jylla, yn aiti beit ha ki Bank, kumta ki jingmut ba bha jong ka sorkar, kin nym poi satia shaei shaei, hynrei kin shu kut, ha ka jing ia sam pisa, hapdeng ki tnat sorkar bad ki Bank.