Ka jingkanbas ia ka elekshon sha Sohiong, ka la sdang ha ki khyndiat sngi ba ladep, hynrei mar ia sdang, la iohi, ia ki jingkren wohnia wohdaw ia kiwei bad ki jingsait ksan bad saitkhuid ialade.
Ka elekshon sha Sohiong, ka dei kaba ki paidbah, ki la dep rai ialade bad sa tang ba kan shu wan ka sngi thep vote jong ka 10tarik Jymmang ba kin shon ia ka shap, kaba kat ka mon ka jongki bad kumta, ban iakren ia ka sorkar, kam don jingmyntoi shuh, namar ba u paidbah, ula kham stad ma u ban ia kita kiba kam nongialam ialade bad ula tip ruh, ba kane ka dei ka sorkar synrop bad kumta uwei U MLA na Sohiong, un nym lah satia ban pynkylla sorkar, ban iakren ia ka shuki minister ruh, ka la jwat, namar ba ki la dap lut, baroh 12ngut bad kaba sah, ka long sa tang ka shuki Chairman ne kiwei ki shuki thohmut thohmat bad ia mynta hi, ka Sohiong, ka dei ban ioh ia u ksiang jong ka Constituency bad jong ka jaitbynriew, uba nud ban kren ia ki mat kiba donkam kyrkieh ha kine ki sngi.
Kaba pyni biej shibun, ka long ba mynta ki leit kren ia ka sobjek sdien bos lane ki iakren ia ka sorkar, kaba ialam da ka seng NPP bad katei ka jait jingkren, kam iahap satia, haba la dep thaw ia ka sorkar synrop bad hap ruh ban sngewthuh ba ki seng BJP, HSPDP, PDF, UDP bad kiwei kin nym shu hap hi, kumba hap slap ban leit iasoh sha ka sorkar NPP, lada ym ba leit wad ia ki.
Kumba ka paw ia mynta, kaba ka jaitbynriew ka iakren bha, ka dei halor ka ishu jong ka bhah kam bhah jam bad kumta ki sengbha lang, ki seng sain pyrthei, ki dei ban leit sha Sohiong bad ban leit iakren bad ki kyrtong lane ki seng, kiba ialeh ia kane ka elekshon, la ki nud ne em ban ther ha iing dorbar, halor kane mat bad ia uta uba nud ban ther bad ban buddien, ha ki san snem ban sa wan, kumta, ki nong Sohiong, ki dei ban nion beit ia uta ba un jop donburom.
Ka Hima Sohiong, ka don ruh ia u pud bad ka Assam bad kane ruh, ka dei ka mat kaba donkam bha, namar ba mynta ka don ka jing ia pynbeit hapdeng ki ar jylla bad la U MLA jong katei ka thain, u nud ne em ban khanglad, ia ka jingthombor ia ki jaka puta.
Ki paidbah ka Sohiong, ki hap shai bha ruh, ba ki MLA lane ki MDC, kim dei ban kam trai lut ia baroh ki skhim, namar ka skhim um, ka dei ka skhim jong ka sorkar India, ki skhim surok, kiba heh, ki dei ki jong ka sorkar India, kito ki skhim 10,20 metre dei ki state scheme, nangta u khaw iohei, ka skhim 100 sngi, ki dei ki skhim jong ka sorkar India bad ki nongthep vote, ki dei ban sngewthuh shai bha, ban nym pyn iakhleh ia ka MLA skhim bad ki skhim jong U Narendra Modi, kiba la theh buk buk na Delhi.
Ngi na sohiong ngi la dep rai ha ibah pupe naka UDP iba nud shisha ban kren iaki jing eh jong ki paitbah….bad udei ruh u briew bastad na baroh ki candidate ha sohiong bad udei uba shlur