Ki miaw bamkhun, ki kha hi bad ki sa bam hi ia ki khun

Ka elekshon sha ka dorbar jylla, ka dang shu dep, dang 10bnai eiei bad ka la long ka elekshon, kaba iaid beit iaid ryntih, ha ka jingshongshit jong ki nongthep vote ha ka jylla hi baroh kawei bad hadien kata, ka sa mih ka sorkar synrop hapdeng jong ka NPP, ka UDP, ka BJP bad ka HSPDP bad balei ba ka mih, katei ka sorkar synrop, ka dei namar ka jingkwah hi jong ki nongthep vote, khamtam, kito kiba ha Khasi hill, ha kaba ki jied toit toit ia ki MLA jongki, la kumba jied shiah bad na katei ka jingkhein, ka UDP, ka ioh 12ngut ka HSPDP 2ngut, Congress 4ngut bad kumta ter ter; katba ha Garo hills, ki jied beit tang ia ka NPP, haduh 19ngut ki MLA bad ka dei na katei ka daw, ba ka NPP, ka sa iohlad ban ialam ia ka sorkar ha ka jylla.

Mynta, haba ka mih ka sorkar synrop, ki sdang ban biah phongrai, da kaba pynbudnam ia ki MLA, kiba ki la jied hi ma ki; hynrei, ha kaba kum kane ka jingjia, kito ki nongjied, ki dei ban peit shwa ia ka lyngkdong lajong bad kata ka long ba ia ka NPP ruh kim shaniah, ia ka UDP ruh em, ia ka BJP, kaba synshar ha India ruh em bad mynta pat, sa ia ka tim ka rngop ia kine ki seng, kiba ia thaw sorkar lang, la kumba ki shu ia poi hi ha Assembly, khlem don ba jied ia ki bad kum kine ki jait briew, ka pyni, ba ki dei ki riew khlem nongrim, kiba pynkitpop tang ia kiwei bad kiba kwah ban pynlong elekshon man ka snem ba kin ia kamai bai kyiad ialade.

Kine kijuh, ki jait jingthaw kynsha, ki kynshi kyneh bad bein bad rngop ia ki MLA lajong bad kane ka dei ka kam pohjait pohrati, ha kaba tang ban trei ruh, kim pat ioh; hynrei ki la shah tim kumba tim ksew bad nangta, kine kijuh ki nongjied, ki ia sdang ban sait khuid ialade, kum ki angel bad sa ka leh lymbit ban kynthih na kawei ka parti sha kawei pat.
Ka la dei ba ngin sngewthuh shai, ba ka sorkar kam ju wan hi, lada jia ba kim jied ki nongjied bad haba ki jied ia ka sorkar synrop, kumta ruh ka dei hi ban wan bad haba iakren ia ka kynhun synrop, ngi dei ban kynmaw, ba wat ka seng BJP kaba synshar ia ka Delhi, ka don ia ka kynhun, kaba ki ai kyrteng National Democratic Alliance (MDA).

To ruh ngin ai nuksa ia ka sorkar thymmai ha Mizoram, ka Zoram Peoples Movement (ZPM) bad kane ka dei ka sorkar kaba la ioh ban synshar, da ka mon ba tylli jong u paidlang ka Mizoram, ha kaba ka ioh haduh 27ngut ki dkhot ha ka iing dorbar kaba 40ngut ha Mizoram.

Kumta lada ki paidbah nongjied jong ka Khasi, Jaintia hills, ki nang ban jied nongmihkhmat, tang kum ki nong Mizoram; kumta kam long satia kaba eh ban ioh ia ka sorkar kaba khuid bad kaba bit tam na ka bynta u paidlang jong ka jylla; hynrei haba ka jubor ka jingpang tare pisa bad dei hangne, ba sa mih ka jingpang kaba ktah ia ka jabieng bad kren lamwir ba rhah pisa.