Ki kyrtong, ki ban iakhun ia ka elekshon Lok Sabha, na Shillong Constituency

Ki don hynriew ngut ki kyrtong, ki ban iakhun ia ka elekshon Lok Sabha na Shillong Constituency bad kitei ki kynthup ia U Ma Vincent Pala, uba don 56 snem bad uba dei u khun jong ka kong Hermelinda Pala na ka shnong Lamyrsiang, East Jaintia hills. U Ma Vincent Pala, ula long MP, la laisien kynthih na Shillong Constituency, ha kaba un iakhun biang na ka seng Indian National Congress.

Nangta sa ka Dr Mazel Ampareen Lyngdoh, kaba don 58 snem ka rta, kaba dei ka khun jong U Bah Peter Garnette Marbaniang (ba la khlad noh), kaba shong ba sah ha Laitumkhrah, Shillong bad katei kan iakhun na ka seng NPP.
U bah Robertjune Kharjahrin, uba don 35 snem ka rta, u dei u khun jong ka kong Dhupstina Kharjahrin (ba la khlad noh) bad u dei na ka shnong Mawthawpdah, South West Khasi hills, ha kaba un iakhun na ka seng UDP.
U Prof Lakhon Kma, u khun ka kong Shantina Kma, u don 47 snem bad uba shong ba sah ha Lawsohtun, ha kaba un iakhun kum u kyrtong shimet.

U Dr Ricky Andrew J Syngkon, uba don 52 snem ka rta, u dei u khun jong Sainbor Jones Syngkon (ba la khlad noh) bad u dei u nongshong shnong jong ka Nongsder, Ribhoi District, ha kaba un iakhun ia kane ka elekshon, na ka seng VPP.
U Bah Peter Shalam, khun jong Shimni Mawthoh, u dei uba na Kharmalki bad u don 58 snem ka rta, ha kaba un iakhun kum u kyrtong shimet.
Ha kane ka elekshon Lok Sabha, ka paw shai, ba U bah Robertjune Kharjahrin, u dei u kyrtong, uba khynnah tam, ha kaba u don dang 35 snem ka rta bad ka kong Ampareen, ka dei kaba rangbah tam, ha kaba ka don 58 snem ka rta, katba kum ki jingthoh jingtar, ba ki pyni, ha ka por, ba ki thep kyrteng.

Ki kyrtong, ki dei kiba la bit la biang suda, ha ka kyrdan pule, ha kaba U ma Vincent Pala, u dei u Engineer, nangta ka kong Ampareen, ka dei kaba la pyndep ia ka kyrdan doctorate, U bah Robertjune, u dei u riewsaid ain bad nangta sa ki arngut ki kyrtong, kiba kynthup ia U Ma Lakhon Kma bad U Dr Ricky Syngkon, ki dei ki nonghikai ba rangbah jong ka NEHU; hynrei ha ka jingialeh, ka shong ha ka mon jong uba bun balang, iano u ibit bad iano u mon ba katei kan shong ha ka 19tarik Iaiong 2024, kaba dei ka sngi ban jied ia uwei u dkhot sha Lok Sabha.

Ka Ri Khasi Jaintia, ka jied tang ia uwei u dkhot, u ban leit sha Lok Sabha bad kumta, kam shong eh, ha ka jing ia said jong ki kyrtong ne ki seng sain pyrthei bapher, hynrei u paidlang ka Ri Khasi Jaintia, u dei ban long uba stad, ban jied shiah ia u rangiar khad u khun ka blei, uba dei ban leit ban ia pyni bor bad ki 500ngut tam ki dkhot ha ka dorbar Lok Sabha, ban mih madan bad ka shong ha ka jingstad jong u paidlang ka Constituency, kumba 12 lak antad, ban shim ia ka rai kaba shemphang bad kaba biang eh, ba kin nym babe, hadien ka 19tarik Iaiong 2024.