Ki kynthei, sha ka khaii met

Ka sobjek jong ki rot, ka la mih madan, ha kine ki sngi, ha kaba wat ki MLA bad ki myntri sorkar ruh, ki hap ia shut jabieng bha ialade, halor katei ka mat, kaba la mih haba shai haba shit.

Ka mat hangne, ka long, ba haba ki rot, ki kam jait ialade, kum ki Mylliemngap, kum ki Kharmuti bad kiwei; ka don ka jingsngew rem bad sngew bitar jong kito ki kur kiba hap ha kitei ki jait bad nangta, haba ki rot, ki kam shnong ialade ruh, ki shah byrngem byrsit ha ki bor shnong bad wat ha U MLA ruh.
Hynrei ka jing shisha, ka long ba haba ki sei ia la ka jong ka jait shabar, ki bun kiba lehrain; katba haba ki sei la ki jong ki jingeh, kim pat don kiba tyrwa ban iarap bad ka dei hangne kein, ba ki ong ba ka kham bha, ban iada, ban ia kaba sumar ia ka jingpang, lane ha kawei ka kyntien, kaba ki ong ruh “isih ia ka pop, tangba ym dei satia ia u nongpop”.

Ka kam die met, ka dei ka jingpang, kaba don ha u ne ka briew shimet shimet bad ka don la ka jong ka jingsniew bad ka don ruh la ka jong ka jingbha bad kata ka long ba ka jingsniew, ka dei ka kam die met, katba ka jingbha, ka long ba kitei ki ioh ban bsa, ia la ka iing ka sem, ia la ki khun ki kti jongki bad kata ka long, ba ki pyn kylla pisa lieh na ka jing ioh kamai kaba sniew bad lada shim na ka jingkhein ka sorkar, ba ki don 1,500ngut tam, kiba die met, kumta katei ka la dei ka karkhana kaba heh bha, ha ka trei kam lajong.

Ban pynduh ia ka kam die met, kam dei satia kaba suk bad kam dei hi ruh ka kam jong ka sorkar, hynrei ka dei ka bynta jong ki kynhun sengbhalang, ki seng longkmie bad ki seng niam, ba kin shimti ia ka jing kitkhlieh, na ka bynta ban btin lynti, ia kitei ki riew shem lanot, ba kin ioh kamai jakpoh ialade, da kiwei pat ki kam kiba thymmai bad ka la dei ruh ia kitei ki thei die met, ba kim dei satia ban mih rynsan, ban ia kob ia tainia, lane ia dawa hok, dawa bhah na ka sorkar lane na kano kano ka bor ain; hynrei lada ki kwah ban kylla, ia la ka jong ka jingim, ka ju don ka lynti; hynrei, lada ki kwah pat ban pyn kylla ia ka khyndailad, kum ka jaka kamai jong ki nuti, kata ruh, ka shong ha ka jingsngew jongki hi bad lada ki sngew dei pynban, ban bsa ia la ki khun ki kti, ki para ki pyrsa, da ka pisa kaba die met, kata ruh, ka shong ka jing ia tip lem jongki hi.